QazNIIOR radıologıa jáne ıadrolyq medısına bóliminiń meńgerýshisi Jandos Amanqulov ıadrolyq medısınanyń zamanaýı álemde, ásirese, onkologıa salasynda mańyzdy oryn alatynyn atap ótti.
Jandos Amanqulovtyń aıtýynsha, radıoaktıvti ızotoptardy paıdalaný arqyly júrgiziletin tehnologıalar aýrýdy erte kezeńderde anyqtap qana qoımaı, tıimdi emdeýdi de júzege asyrýǵa múmkindik beredi, sonymen qatar saý tinderge áserin meılinshe azaıtady.
– Iadrolyq medısınanyń mańyzdy baǵyttarynyń biri – dıagnostıka. Radıoızotoptyq dıagnostıka ishki aǵzalar men tinderdi jáne olardyń patologıalaryn joǵary dáldikpen vızýalızasıalaýǵa múmkindik beredi, bul óz kezeginde tıimdi emdeý ádisterin ýaqtyly qoldanýdyń yqtımaldyǵyn arttyrady. Mysaly, pozıtrondyq-emıssıalyq tomografıa kompúterlik tomografıamen birge isiktiń sýretin alýǵa jáne onyń metabolıkalyq belsendiligin baǵalaýǵa múmkindik beredi. Bul, ásirese, onkologıada mańyzdy, óıtkeni emdeýdiń sáttiligi kóbinese aýrýdyń erte anyqtalýy men onyń satysyn dál anyqtaýǵa baılanysty, – dedi Jandos Amanqulov.
QazNIIOR derekterine súıensek, eldegi qaterli isik aýrýlarynyń deńgeıi ár 100 myń adamǵa 200-den astam jaǵdaıdy quraıdy. Tek ótken jyly 44 909 jańa jaǵdaı tirkelgen.
– Iadrolyq medısınany onkologıalyq aýrýlardy dıagnostıkalaý jáne emdeýde qoldaný pasıentterdiń bolashaǵyn aıtarlyqtaı jaqsartady. Bul baǵytty damytý, jańa tehnologıalarǵa ınvestısıa salý jáne mamandardy daıarlaý óte mańyzdy, osylaısha elimizdiń árbir azamaty joǵary sapaly medısınalyq kómekke qol jetkize alady, – dep qorytyndylady Jandos Amanqulov.