Elimizdiń astanasy Nur-Sultan qalasynyń týǵan kúni qarsańynda Almatyda birqatar nysandardyń ashylý saltanaty boldy. Solardyń biri – Túrksib aýdanyndaǵy «Adel» balabaqshasy. Qazirgi zamanǵa saı etip salynǵan záýlim balabaqsha 1 shildeden bastap búldirshinderge esigin aıqara ashty.
Túrksib aýdanynda qalanyń basqa da aýdandary sekildi mektep jasyna deıingi balalarǵa arnalǵan bilim ordasy tapshylaý, balabaqshalarda oryndar da shekteýli ekeni ras. Sondaı-aq balabaqshanyń qurylysyn qolǵa alǵan merdigerlerdiń aıtýynsha, bul aýdanda balalar men olardyń ata-analaryna jaıly, jańa zamannyń talaptaryna jaýap beretin, ınovasıalyq, ozyq balabaqshalar joqtyń qasy. Al jas urpaqtyń bilimdi bolýy úshin olarǵa berilgen bilim men tárbıeniń irgetasy myqty bolýy kerek. Sondyqtan mektepke deıingi bilim ordasynyń sapaly bolýy asa mańyzdy.
Túrksib aýdanynyń shetkeri jaǵynda, Súıinbaı kóshesiniń tómengi tusynda ornalasqan «Adel» balabaqshasynyń ornynda buryn tıptik balabaqsha bolǵan edi. Keńestik kezeńnen qalǵan balabaqshanyń tozyǵy jetip, ábden eskirgen bolatyn. Merdiger osy balabaqshanyń aýmaǵyn túgeldeı óz menshigine alyp, eski ǵımaratty kúrdeli jóndeýden ótkizdi, japsarlas qurylys júrgizdi. Balabaqshanyń qurylysyna shamamen 50 mıllıonnan astam qarjy jumsalǵan.
Balabaqsha negizinen orystildi balalarǵa arnalǵan. Alaıda munda qazaq tili men aǵylshyn tilderi tereńdetilip oqytylady. Sýret, mýzyka, sport úıirmeleri de qarastyrylǵan. Bolashaqta balabaqsha janynan balalardy damytý ortalyǵy jáne mektep ashý josparlanyp otyr.
Larısa Andreevna, «Adel» balabaqshasynyń merdigeri:
Balabaqsha men úshin bıznes emes...
- Osydan birneshe jyl buryn men Túrksib aýdanynan nemeremdi beretin balabaqsha izdedim. Memlekettik te, jeke menshik te balabaqshalardy aralap kórdik, biraq kóbi kóńilimizden shyǵa qoımady. Balabaqsha eń aldymen balalarǵa óz úıindeı jaıly, ádemi bolýy kerek jáne ol jerde óz jumysyn jáne balalardy jaqsy kóretin adamdardyń jumys istegeni mańyzdy. Sol kezde nege ózimiz qalaǵandaı balabaqsha ashpasqa degen oı keldi.
Balalar – bizdiń bolashaǵymyz. Olar jaqsynyń bárine laıyq dep oılaımyn. Sondyqtan osydan tórt jyl buryn eski balabaqshany qaıta jańǵyrtýǵa kúsh saldyq. Eki jyl boıy jóndeý jumystary jalǵasty. 2019 jyldyń naýryzynda ashamyz ba degen kezde pandemıaǵa sáıkes kep qaldy. Sonymen ashylýyn keıinge qaldyrdyq. Mine, bıyl balabaqshany ashýǵa bel býdyq. Óıtkeni eshteńege qaramastan balalar ósip keledi, olarǵa jaqsy bilim men tárbıe beretin bilim ordasy qajet. Bizdi qoldap, barynsha qol ushyn bergen bilim basqarmasyna alǵysymyzdy bildiremiz. Men tárbıeshiler men basqa da qyzmetkerlerdi jumysqa ózim tańdaımyn. Bilimderine, tájirıbelerine, mamandyqtaryna degen adaldyǵyna qatty mán beremin. Qyzmetkerlerimizdiń bilimi men biligin únemi tereńdetip otyrýǵa tyrysamyz. Balabaqsha ashýdaǵy maqsatymyz - tabys taýyp, kásipti dóńgeletý emes, jas urpaq úshin saýapty is jasap, memlekettiń órkendeýine tamshydaı bolsa da úlesimizdi qosý.
Aısulý Amangeldiqyzy, Almaty qalasy bilim basqarmasy basshysynyń orynbasary:
- Táýelsizdigimizdiń 30 jyldyǵy qarsańynda, elordanyń týǵan kúniniń qurmetine qalamyzda kóptegen balabaqshalar ashylýda. Qalanyń Alataý, Naýryzbaı, Túrksib aýdandarynda jańa balabaqshalar ashylyp jatyr. Sonyń biri - osy «Adel» balabaqshasy. Kórip otyrǵandaryńyzdaı, balabaqsha óte keremet salynǵan, árbir bólshegi talǵammen jasalǵan. Bul balabaqsha baıqaýdan ótip, memlekettik tapsyrys alǵaly jatyr. Baıqaýǵa barlyǵy 136 balabaqsha qatysty, sonyń ishinde mektepke deıingi bilim ordalarynyń 40-y memlekettik tapsyrysqa ıe boldy. Búginde eń mańyzdysy - 3 pen 6 jasqa deıingi balalardy balabaqshamen tolyq qamtamasyz etý. Qazir qala boıynsha mektep jasyna deıingi balalardyń balabaqshamen qamtamasyz etilýi – 89,5 paıyz. Jyl sońyna deıin bul kórsetkishti 91 paıyzǵa jetkizýdi kózdep otyrmyz. Jalpy, 2025 jylǵa deıin balalar 100 paıyz balabaqshamen qamtylýy tıis.
Qalalyq bilim basqarmasy ókiliniń aıtýynsha, qazir balabaqshalarǵa memleket tarapynan, jergilikti bılik tarapynan barynsha jaǵdaı jasalýda. Alǵashqy kezderde jeke menshik balabaqshalarǵa qıyn edi. Qazir ýaqyt ótken saıyn bári jeńildedi. Almaty qalasynyń ákimi Baqytjan Saǵyntaev memlekettik tapsyrystan bólek balabaqshalarǵa basqa qandaı kómek kórsete alamyz dep Bilim mınıstrligine hat jazdy. Osydan keıin buıryqqa azdaǵan ózgerister engizilip, jergilikti basqarý oryndary balabaqshalardyń tamaǵyn tolyq jáne ishinara sýbsıdıalaýǵa múmkindik berdi. Bul degenimiz - ata-analarǵa jasalǵan úlken jeńildik.
Buryn memleket «Balapan» baǵdarlamasyn 3 jastan asqan balalarǵa arnap jasaǵan bolatyn. Qazir 2 jastan asqan balalarǵa da ruqsat etildi.