Kásipkerlerdi sybaılas jemqorlyqtan qorǵaýdyń ózekti máseleleri talqylandy.
Almaty qalasynyń Sybaılas jemqorlyqqa qarsy qyzmetiniń ortalyǵynda bıznesti qorǵaý, bıznestegi sybaılas jemqorlyq máselelerine arnalǵan brıfıń ótti. Jıyn barysynda birqatar ózekti másele talqylanyp, spıkerler jýrnalıserdiń suraǵyna jaýap berdi.
Qalada ekologıa, bıznes úshin jer ýchaskelerin bólý jáne ınfraqurylymdy bıznes obektilerine jetkizýde jalpy qoǵamnyń barlyq salasynda jemqorlyq beleń alǵan.
Brıfıńke Almaty qalasynyń Sybaılas jemqorlyqqa qarsy qyzmetiniń basshysy Asqat Orazhan, Almaty qalasynyń «Atameken» kásipkerler palatasynyń dırektory Aıtýar Koshmambetov jáne BAQ ókilderi qatysty.
«Qazirgi tańda Sybaılas jemqorlyqqa qarsy qyzmettiń negizgi baǵytynyń biri – azamattardyń áleýmettik
ál-aýqatyn jaqsartý jáne halyqtyń problemalyq máselelerin sheshý. Osyǵan deıin óńirlik máselelerge tereń úńilip, árbir óńirdiń ereksheligin eskere otyryp, agenttik árbir oblys pen respýblıkalyq mańyzy bar qalalar úshin sybaılas jemqorlyq táýekelderiniń kartasyn ázirledi. Kartada ashyqtyqqa, ákimshilik kedergilerdiń bolýyna, zańnamanyń jetilmegendigine baılanysty sheshim taba almaıtyn ózekti máselelerdiń tizimi kórsetilgen. Almaty qalasynda qala turǵyndaryn tolǵandyratyn 6 negizgi sala anyqtaldy. Olar - qurylys jáne turǵyn úı salasyndaǵy sapasyz qurylys, áleýmettik turǵyn úı bólý kezindegi sybaılas jemqorlyq táýekelderi, shet aımaqtardy damytý, ekologıa, atap aıtqanda, erekshe qorǵalatyn tabıǵı aýmaqtardyń jerlerin paıdalaný, sý qorǵaý aımaqtarynyń mańynda qurylys salý, aýanyń lastanýy, ekonomıka jáne qarjy. Aımaqtyń ekonomıkalyq damýyna baǵyttalǵan qarajatty paıdalaný erekshe nazar aýdarýdy talap etedi. Fıskaldyq sala, atap aıtqanda, keden, kontrabanda, salyqtardyń túspeýi. Jer. Azamattar qalanyń núktelik qurylysyna, jerdiń zańsyz bólinýine narazy. Áleýmettik sala. Munda bilim men densaýlyq saqtaý salalaryn atap ótýge bolady.
Shaǵyn jáne orta bıznestiń damýyna zańsyz kedergi keltirgenderdiń barlyǵy zańǵa sáıkes qatań jazaǵa tartylady. Kásipkerlerden tek adal kásip júrgizýin suraımyz!» - dedi Almaty qalasynyń Sybaılas jemqorlyqqa qarsy qyzmetiniń basshysy Asqat Orazhan.
Aıta ketetin jáıt, Almatyda 250 myńnan astam shaǵyn jáne orta kásipkerlik tirkelgen. Qala shaǵyn jáne orta kásipkerlik ónimderin óndirý kólemi boıynsha kósh bastap turǵanyna qaramastan, munda bıznesti damytýda kedergiler joq emes. Kásipkerler kezdesetin negizgi másele – ruqsat berý qujattaryn alý, salyq salý jáne salyqtyq tekserýler, kóshi-qon máseleleri jáne t.b.
Qalada «Kásipkerler kúni» ótkiziletin bolady
Almatynyń Sybaılas jemqorlyqqa qarsy qyzmeti vedomstvo qyzmetkerleri, shaǵyn jáne orta bıznes, kásiptik bıznes-qaýymdastyqtar jáne «Atameken» ÓKP ókilderi qatarynan mobıldi top qurdy. Bul týraly bıznesti qorǵaý máselelerine arnalǵan brıfıń barysynda aıtyldy.
«Mobıldi top qurýdyń negizgi maqsaty – kásipkerlerdiń problemalyq máselelerin sheshýge baǵyttalǵan birlesken jáne kelisilgen is-qımyldardy ázirleý jáne iske asyrý. Biz bıznestegi ózekti máselelerdi tez arada sheshýge atsalysatyn bolamyz», - dep atap ótti Almaty qalasynyń Sybaılas jemqorlyqqa qarsy qyzmetiniń basshysy Asqat Orazhan.
Osy baǵyttaǵy taǵy bir jaǵymdy jańalyqtardyń biri - aı saıyn qalanyń bıznes-qaýymdastyqtarynyń alańdarynda «Kásipkerler kúnin» ótkizý josparlanýda.
«Qoǵamdyq qaýymdastyq retinde óz tarapymyzdan osy bastamalardy qoldadyq. Sebebi bıznes mundaı ákimshilik kedergilerdi qalaı joıý kerektigin jáne keıin ókinbeý úshin qaıda júginý kerektigin bilmeı, qorqyp jatady. Al atalǵan alańdarda kásipkerler úshin jańa múmkindikter ashylýda, óıtkeni munda olardyń máselelerin zań aıasynda sheshýge daıyn», - dep Qazaqstan Kásipkerler forýmynyń atqarýshy dırektory Mýnavara Paltasheva óz oıyn bildirdi.
Brıfıń qorytyndysy boıynsha Sybaılas jemqorlyqqa qarsy qyzmet kásipkerlerdi «E-ótinish» portaly, 1424 Sybaılas jemqorlyqqa qarsy qyzmettiń call-ortalyǵy nemese Facebook platformasynda basshylyqtyń jeke akkaýntyna jazý arqyly kez kelgen sybaılas jemqorlyq kórinisteri týraly habarlaýǵa jáne shette qalmaýǵa shaqyrdy.
Sondaı-aq, vedomstvo habarlaǵandaı, «Kásipkerler kúnin» ótkizý ýaqyty men orny áleýmettik jelilerde jáne Departamenttiń resmı paraqshasynda jarıalanatyn bolady.
Byltyr departament shaǵyn orta bızneske aralasý faktileri boıynsha 24 qylmysty tirkegen
Almaty qalasy Memlekettik kirister departamentiniń Túrksib aýdany boıynsha memlekettik kirister basqarmasynyń bas mamany N.Qarabalaev jeke kásipker shotynan qamaýdy alyp tastaı otyryp, arnaıy salyq rejımin qaldyrǵany úshin kásipkerden 260 myń teńge somasynda para aldy. N. Qarabalaevqa 7.8 mıllıon teńge aıyppul túrinde jaza taǵaıyndaldy.
Ókinishke qaraı, qalada kásipkerliktegi jemqorlyqqa qatysty mundaı faktiler az emes.