Tık-Tokta taý etegindegi qara joldyń boıynda jýa satyp otyrǵan bozbalanyń vıdeosy mıllıondaǵan qaralym jınap, kóptiń ystyq yqylasyna bólendi. Vıdeony paraqshalarynda júzdegen adam bólisti.
Taý jýasyn satyp otyrǵan Aıarys esimdi qazaq balasynyń janyna taıap barǵan jigit:
– Ne istep otyrsyń? – dep surady.
– Saýda jasap, – dep jaýap berdi Aıarys.
– Bul ne?
– Jýa ǵoı. Sarymsaq.
– Buny qaıdan aldyń?
– Anaý taýdyń basynan terip keldim.
– Óziń terdiń be?
– Iá.
– Sabaǵyńa kedergi keltirmeı me?
– Joq. Tústen keıin shyǵamyn.
– Ózińe unaı ma, bul jumysyń?
– Iá. Tabıǵatta. Ásem jerde. Taza aýada.
– Aıarys, meniń sýretke túsiretin ádetim bar edi. Kel, kishigirim fotosessıa jasap bereıin saǵan.
– Meıli, – dedi 10-synyp oqýshysy Aıarys degen boıshań, kórikti bozbala.
Vıdeonyń astyna jazylyp jatqan pikirlerde shek joq desek te bolady. «Adal eńbek adamdy súıkimdi etedi. Eńbegi jansyn!», «Adal eńbeginiń rahatyn kórsin. Basqa jasóspirimderge úlgi bolsyn», «Ol jýany sen termeseń, beker ósip, shirip ketedi. Paıdaǵa asyryp júrgeniń úshin óte qýanyshtymyn» degen jazbalar bar. Endi biri «Bul – «Qyzyl kitapqa engen» jýalar. Baıqa, abaıla!» dep alańdaýshylyq bildirip jatsa, endi bir top «Bul kópjyldyq ósimdik qoı, qaıta ósip shyǵady. Bastysy – adal eńbek etip júr», «Búgingideı zamanda buzylyp ketpeı, adal jolmen aqsha taýyp júrgeniń úshin rızamyn. Keremet, taza eńbek!», «Bos, erigip, ata-anasyna masyl bolǵannan eńbekpen nan tabýdy bilgeniń qandaı jaqsy», «Janym, altynym, túbi úlken adam bolady!», «Úıde jatyp sotka shuqylamaı, eńbektenip júrgenin aıtsańshy. Aman júr, aınalaıyn!» degen lebizderimen arashalap alyp jatyr.