«Almaty aqshamy» gazeti Bas redaktorynyń orynbasary Ánýar Áýelbek týraly lebiz
Bizdiń aıaýly áriptesimiz, «Almaty aqshamy» gazeti Bas redaktorynyń orynbasary Ánýar Áýelbek 63 jasqa tolyp, zeınetke shyǵyp jatyr. Qazaqtyń sanyn kóbeıtýge eleýli úles qosqan kópbalaly áke. Aqyn, jýrnalıs. Ál-Farabı atyndaǵy Qazaq ulttyq ýnıversıtetiniń Jýrnalısıka fakúltetin bitirgen.
Respýblıkalyq «Lenınshil jas» («Jas Alash»), «Qazaq ádebıeti», «Egemen Qazaqstan», halyqaralyq «Túrkistan», «Dala men qala» gazetteri men «Habar» telearnasynda qyzmet istegen. Osy telearnadan berilip turǵan tarıhı-tanymdyq 110 serıaly «Solaı bolǵan» baǵdarlamasynyń avtory.
«Aq jaýyndy shaq», «Janyńmen jaz syryńdy» atty jyr kitaptarynyń, sondaı-aq, «Solaı bolǵan» jáne «Bolashaǵyna qol sozǵan Qazaqstan» atty pýblısısıkalyq kitaptardyń avtory. Óleń-jyrlary 2015 jyly jaryqqa shyqqan 10 tomdyq «Qazaq poezıasynyń antologıasyna» engen. QR Mádenıet qaıratkeri, «Aqparat salasynyń úzdigi», «Eren eńbegi úshin», «Halyq alǵysy», «Meıirim» tósbelgileriniń jáne «Y.Jaqaev» medaliniń ıegeri.
Ánýar Áýelbektiń shymshyma ázilderi de birtóbe. Anekdotty jaqsy aıtady. Úlken-kishige teńdeı ázildeı beredi. Esh zilsiz. Sondyqtan eshkim kóńilge alyp renjı qoımaıdy. Tómende áriptesimizdiń ázilqoı bolmysyn ashatyn birer oqıǵasyn berip otyrmyz.
Táýelsizdik jáne sulýlyq
Qalam ustap júrgen soń, úıiniń aınalasynda turatyn úlken-kishi Ánýar Áýelbekti merekelerde jıi mazalaıtyny bar. Máselen, muǵalimder «Ashyq sabaǵym bar edi, Án-aǵa, eki-úsh shýmaq óleń kerek bop tur» dese, áp-ádemi stýdent boıjetkender «Aǵa, Táýelsizdik týraly bir shýmaq óleń shyǵaryp beresiz be?» dep qıylyp turǵandary.
Ádemilikke, sulýlyqqa qumar aqynjandy áriptesimiz qarap qalsyn ba, ásirese, arýlar suraǵan Táýelsizdikti de, ózderiniń kórkemdigin de appaq paraqqa túsirip, shabyttana jyrlap beredi.
Taǵy birde esiktiń qońyraýy basylady. Terezeden ádemi bir qyzdyń kelgenin baıqap turǵan Ánýar aǵaı zaıybyna jorta:
– Bireý kelip turǵan sıaqty, kim eken, qaraı salshy, – degen ǵoı, sulýlyqqa súısine, mańǵazdanyp turyp.
Sonda jeńgemiz terezeden moınyn sozyp:
– E-e, Táýelsizdik qoı! – degen eken. Jeńgemiz de osal jan bolmady.
Dúnıe – kezek
«Almaty aqshamy» gazetine alǵash kelgen kezim. Ánýar Áýelbektiń kabınetine «Jyljabar» nómirine beriletin bir maqala jóninde aqyldasý úshin bas suqtym.
Sol maqalaǵa qatysty ózimizdiń jýrnalıst-áriptesterdi Qalekeń (Qalı Sársenbaı), Tókeń (Tórehan Danıar), Ótesh (Ótesh Qyrǵyzbaı), Sárseaǵań (Sársenbek Bekmuratuly) dep qalamynyń ushymen tizip kele jatty da, Nurjamal Baısaqalǵa kelgende aq qaǵazyna «NB» dep túrtip qoıdy. Al men sizge osy «NB»-nyń tarıhyn aıta otyraıyn.
Belgili jýrnalıs Nurjamal Baısaqal men Ánýarbek Ánýar jýrfakta bir kýrsta oqyǵan. Eti tiri, kez kelgen nársege nemquraıdy qaraı almaıtyn sergek, qaǵilez arý starosta bolǵan. Kýrstyń ulyn da, qyzyn da urshyqsha ıirip áketip, barlyq is-sharanyń ortasynda júretin.
Sabaqtan kóp qalatyn jigitterdi jýrnalǵa «nb» (Keńes odaǵy kezindegi «ne bylo») dep birde belgilese, endi birde belgilemeı keńshilik jasaıtyny da bar. Án-aǵańdar tipti júıkesine tıip ketse, eki- úsh kún qatarynan «nb» qoıatyny taǵy bar. Starostany odan ári kúıip-pistirý úshin, ashýlanǵanyn qyzyq kórip jigitter: «Erteń eki sabaqta da bolmaımyz, «nb»-yńdy qoıa sal», – deıtin kórinedi.
Eki kýrstastyń ómir hám qyzmet joly keıin «Almaty aqshamy» gazetinde toǵysaryn kim bilgen. Birde Ánýar Áýelbek osy basylymǵa birinshi orynbasar bolyp keldi. Aldyna kelgen, Nurjamal Baısaqaldyń bólimine qatysty óńdeletin maqalanyń sol jaq shekesine NB dep belgi soqty da, kýrstas-áriptesiniń kabınetine kirip baryp:
– Budan bylaı endi men saǵan «nb» qoıatyn bolamyn, – degende, ekeýi de eriksiz kúlip jibergen eken.
Aǵa, baýyr, dos
«Vechernıı Almaty» gazetiniń jaýapty hatshysy Ábdijamal Halıluly jaıynda da birer sóz
«Alatau Aqparat» medıaholdınginiń qanatynyń astynda qanattasa jumys istep kele jatqan «Almaty aqshamy» men «Vechernıı Almaty» gazetterin bólip- jarý múmkin emes. Eki basylym da arý Almatynyń tynys- tirshiligimen bite qaınasyp jatqan irgeli ujym.
Sondyqtan «Almaty aqshamy» gazetindegi áriptesimiz Ánýarbek Áýelbek týraly aıtyp turyp, «Vechernıı Almaty» gazetiniń jaýapty hatshysy Ábdijamal Saparqulovtyń mereıli jasy týraly bir aýyz lebiz bildirmegenimiz azamattyǵymyzǵa syn bolar dedik.
Ábdijamal Halıluly – jýrnalıstıka maıtalmany, «Aqparat salasynyń úzdigi». M.V.Lomonosov atyndaǵy Máskeý memlekettik ýnıversıtetiniń Jýrnalısıka fakúltetin bitirgen. Eńbek jolyn «Órken-Gorızont» gazetinde bastap, fototilshi, tilshi, jaýapty hatshylyqqa deıin kóterilgen. «Trýd-Kazahstan» gazetiniń shtattan tys tilshisi, «Saqshy» gazetiniń Bas redaktory, «Vremá-Ýaqyt» gazetiniń jaýapty hatshysy boldy.
1997 jyly «Qazaqstan polısıasy» jýrnalynyń negizin qalady. Respýblıkalyq «Habar» telearnasynan 2000 jyly jaryq kórgen «Tergeý aıaqtaldy...» («Sledstvıe okoncheno...») televızıalyq jobasynyń avtory ári prodúseri bolǵan.
Iá, Ábdijamal Halıluly jýrnalıstıkanyń maıyn iship, jiligin shaqqan maman. Gazet-jýrnaldyń alǵashqy betinen bastap sońǵy paraǵyna deıingi bezendirilýi, maqalalardyń ornalasýy osy asqan talǵampaz, shyǵarmashyl áriptesimizdiń qolynan, júrek kózinen ótedi.
Ábdijamal Halılulynyń syrt tulǵasy qanshalyqty iri bolǵanymen, basqan izi bilinbeıdi, daýysynyń da qatty shyqqan jerin estimedik. Birimizge aǵa, birimizge dos, endi birimizge baýyr bolǵan úlken júrekti áriptesimiz kózge túsip qalýǵa da umtylmaıtyn qarapaıym, salıqaly, sabyrly jan.
Osylaı asyqpaı, aptyqpaı, aıańdap jetken 63 jasyńyz qutty bolsyn, qurmetti Ábdijamal Halıluly! Sizdiń de barlyq jaqsylyq, qýanyshyńyzǵa «Alatau Aqparat» medıaholdınginiń úlken ujymy árkez tilekshi.
Búgin qos áriptesimizdi zeınet jasymen quttyqtadyq. İzgi lebizimizdi arnadyq. «Alatau Aqparat» medıaholdınginiń Bas dırektory Erjan Qalymbaıuly Ánýarbek Áýelbek pen Ábdijamal Saparqulovtyń uzaq jylǵy eńbegine alǵys aıtyp, qadirli aǵalardyń ıyǵyna shapan jaýyp, ujym atynan syılyqtar tabys etti.