Almatyda Abylaı hannyń 310 jyldyǵyna oraı ǵylymı-praktıkalyq konferensıa uıymdastyryldy
Almatyda «Abylaı han jáne qazaq memlekettiligi: tarıhı úderister men sabaqtastyq» atty Halyqaralyq ǵylymı-praktıkalyq konferensıasy ótti, dep habarlaıdy Almaty-akshamy.kz
Belgili tarıhshy, tarıh ǵylymdarynyń doktory, profesor Zardyhan Qınaıatulynyń İ-shi oqýlary aıasynda Abylaı hannyń 310 jyldyǵyna oraı uıymdastyrylǵan «Abylaı han jáne qazaq memlekettiligi: tarıhı úderister men sabaqtastyq» atty Halyqaralyq ǵylymı-praktıkalyq konferensıasy Ǵylym ordasynyń Sh.Sh.Ýálıhanov atyndaǵy Tarıh jáne etnologıa ınstıtýtynda ótti.
Konferensıa jumysyna kórnekti ǵalymdar men jazýshylar, doktoranttar men magıstranttar qatysty. Negizgi baıandama jasaýshylar Z.Qınaıatulynyń ómir belesteri men ǵylymı izdenisteriniń tarıhymyzǵa qosqan úlesi týraly aıtsa, Abylaı han jáne qazaq memlekettiligi taqyrybyna qatysty baıandama jasaǵan ǵalymdar Abylaı hannyń qazaq tarıhyndaǵy tarıhı róline sol kezeńniń tarıhı konteksinde qarastyrdy.
«Zardyhan Qınaıatuly – kóptegen eńbekter jazdy. Bul kisiniń negizgi zertteý baǵyty – orta ǵasyrlar, Shyńǵys han qurǵan ımperıa, onyń Qazaqstanǵa qatysty tustary. Búgingi konferensıa Zardyhan aǵamyzdy eske alyp, sonyń aıasynda Abylaıhan babamyzdyń taǵdyryn zerdelep, tarıh tulǵalardy nasıhattaý maqsatynda uıymdastyryldy. Sondaı-aq jınaq shyǵaryp jatyrmyz. Bul jınaqqa elimizge tanymal ǵalymdardyń baıandamalary endi. Bul shara bir sáttik emes, jyl saıyn ótkizilip otyrady» – dedi Ejelgi jáne orta ǵasyrdaǵy Qazaqstan men irgeles elder bóliminiń meńgerýshisi Jomart Jeńisuly.
Konferensıa barysynda Zardyhan Qınaıatulynyń ǵylymı zertteýleri men olardyń tarıhı mańyzy, shet elderdegi qazaq zertteýshileriniń eńbekteriniń zerdelený jaǵdaıy, Abylaı han tusyndaǵy Qazaq handyǵy tarıhynyń mazmunyna tujyrymdamalyq jáne ádisnamalyq tásilder, Altyn Orda men Qazaq handyǵynyń sabaqtastyǵy máseleleri jágn Qazaq handyǵy tarıhyn zertteýdiń ózekti máseleleri talqylandy.
Sondaı-aq jıyn aıasynda konferensıa materıaldarynyń jınaǵynyń tusaýkeser rásimi ótti.