Bıyl 29 mamyrdan 29 maýsymyna deıin aǵashtardy sanıtarlyq maqsatta kesý UOS ardagerleri, zeınetkerler, 1, 2 toptaǵy múgedektigi bar adamdar, kámeletke tolmaǵan balalardy tárbıelep otyrǵan jalǵyzbasty analar syndy jalǵyz ózi turatyn áleýmettik osal topqa (HÁOT) jatatyn jandardyń aýlasynda júrgiziledi, dep habarlaıdy almaty-akshamy.kz.
HÁOT-ten aǵashtardy sanıtarlyq maqsatta kesý boıynsha ótinim Almaty qalasynyń Jumyspen qamtý jáne áleýmettik baǵdarlamalar basqarmasynda tel.: 338-30-24 boıynsha qabyldanady. Aǵashtardy sanıtarlyq maqsatta kesý qajettiligin anyqtaý úshin aldyn ala tekserýden keıin aýdan ákimdikteri tıisti is-sharalar ótkizedi. 
Aıta ketetin nárse, aýa-raıynyń qolaısyzdyǵy kezinde qulaý qaýpi bar apatty jaǵdaıdaǵy aǵashtardy alyp tastaý jumystary Almatyda erekshe baqylaýda. Aǵashtardyń jaı-kúıine turaqty túrde monıtorıń júrgiziledi. Aýrý, quraǵan, qaýipti apatty aǵashtar kesiledi. Jazataıym oqıǵalardyń aldyn alý úshin aǵash kesý týraly sheshim jalpyǵa birdeı qorytyndy shyqqan soń qabyldanady. Onyń ornyna 10 ese mólsherde kóshet otyrǵyzylady.
«Almaty – bizdiń ortaq úıimiz» naýqany jáne «Taza Qazaqstan» respýblıkalyq aksıasy aıasynda Almaty ákimi Erbolat Dosaevtyń bastamasymen megapolıste bir aıda 30 myńnan astam japyraqty aǵash jáne 5 myń buta otyrǵyzyldy, bul Nú-Iorktiń barlyq ortalyq saıabaǵynan kóp.
«Almaty – baq qala» aksıasy barysynda qalanyń barlyq aýdanynda 8 205 jasyl jelek otyrǵyzyldy, onyń 4 myńnan astam alma. Turǵyndarǵa óz aýlasyn kógaldandyrý úshin 3 myń kóshet taratyldy. «Mektep aýlasynyń oazısi» festıvali aıasynda almatylyq oqýshylar 20 myńnan astam gúl, 430 jemis aǵashy jáne 200 týı kóshetin otyrǵyzdy.
Memleket basshysynyń tapsyrmasymen «Taza Qazaqstan» respýblıkalyq aksıasy eldi mekender aýmaǵyn kórkeıtý men kógaldandyrýǵa, qorshaǵan ortaǵa uqypty qaraý qundylyqtaryn qalyptastyrýǵa, halyq arasynda joǵary azamattyq jaýapkershilik pen ekologıalyq mádenıetti tárbıeleýge baǵyttalǵan.