Osy jyldyń basynan beri 8 476 azamatqa zıandy eńbek jaǵdaılarynda uzaq ýaqyt jumys istegen adamdarǵa beriletin arnaýly áleýmettik tólem taǵaıyndaldy.
Atalǵan tólemdi taǵaıyndaýǵa barlyǵy 9 255 adam ótinish bildirgen, dep habarlaıdy Almaty-akshamy.kz cala mınıstrligin silteme jasap.
Eki kózden tólenetin arnaýly áleýmettik tólemge (respýblıkalyq búdjet jáne Biryńǵaı jınaqtaýshy zeınetaqy qory) 2 840 adam júgindi, onyń ishinde 2 730 adamǵa taǵaıyndaldy.
Tórt qarjylandyrý kózinen beriletin AÁT (respýblıkalyq búdjet, Biryńǵaı jınaqtaýshy zeınetaqy qory, jumys berýshi jáne ómirdi saqtandyrý uıymy) taǵaıyndaýǵa 6 415 adam ótinish bildirip, onyń 5 746-syna taǵaıyndalǵan.
Sondaı-aq, 369 azamat saqtandyrý kompanıasymen zeınetkerlik anýıtet shartynyń jasalýyn kútýde, 68 azamat SMS habarlamaǵa jaýap bermegen. Mindetti sharttardy oryndamaǵandyqtan, 342 ótinish berýshige AÁT taǵaıyndaýdan bas tartyldy.
Aýmaqtar boıynsha arnaýly áleýmettik tólemderdi alýǵa ótinish bildirgenderdiń eń kóp sany Qaraǵandy (2 kózden – 492 adam, 4 kózden – 1 166 adam), Qostanaı (2 kózden – 318 adam, al 4 kózden – 876 adam) jáne Shyǵys Qazaqstan (2 kózden – 248 adam, al 4 kózden – 882 adam) oblystarynda tirkelgen.
Buryn habarlanǵandaı 2024 jyldyń 1 qańtarynan bastap Qazaqstanda zıandy eńbek jaǵdaılarynda uzaq ýaqyt jumys istegen adamdarǵa arnaýly áleýmettik tólem engizildi.
Arnaýly áleýmettik tólem taǵaıyndaý úshin 55 jasqa tolý jáne Biryńǵaı jınaqtaýshy zeınetaqy qorynda (budan ári – BJZQ) keminde 7 jyl kásiptik zeınetaqy aýdarymdarynyń bolýy mindetti sharttar bolyp tabylady. Tólem zeınetkerlik jasqa deıin tólenedi. Arnaýly áleýmettik tólemderdi alý úshin eńbek jaǵdaılary zıandy jumystarmen aınalyspaýǵa tıis. Jumyskerler jeńil jumysqa aýysa alady, sodan keıin olar jalaqy men tólem alady nemese demalysqa shyǵyp, zeınetke shyqqanǵa deıin arnaýly áleýmettik tólem alady.
BJZQ derekteri boıynsha arnaýly áleýmettik tólemdi taǵaıyndaý úshin mindetti sharttardy eskere otyryp, oǵan 2024 jyly 37 myńnan astam jumysker úmitker bola alady, jalpy tólemniń ortasha mólsheri 208 myń teńgeden asady. Árbir jumysker úshin tólem mólsheri BJZQ-daǵy jınaqtaryna baılanysty bolady.