Búgin Parlament palatalarynyń birlesken otyrysy ótip, onda segizinshi saılanǵan Parlamenttiń ekinshi sesıasy resmı túrde jabyldy, dep habarlaıdy almaty-akshamy.kz.
Bul turǵyda depýtattar bıylǵy 1 qyrkúıekke deıin parlamenttik kanıkýl dep jarıalanatyny týraly arnaıy qaýly qabyldady.
«Búgin biz segizinshi saılanǵan Qazaqstan Parlamentiniń ekinshi sesıasynyń jumysyn aıaqtaǵaly otyrmyz. Dástúr boıynsha atqarylǵan jumysty qorytyndylaımyz, keleshekke jospar quramyz. Memleket basshysy Qasym-Jomart Kemeluly Toqaevtyń saıası reformalary Parlament jumysyna jańa baǵyt-baǵdar berdi. Kóppartıaly Parlament zań shyǵarýshy organnyń qyzmetine tyń serpin ákeldi, qoǵamnyń túrli ıdeologıalyq kózqarastaǵy áralýan ókilderiniń kelýi qabyldanatyn zańdardyń sapasyn arttyra tústi. Munyń bári - Qazaqstan parlamentarızmi tarıhyndaǵy jańa kezeńge aınaldy», - dedi Májilis tóraǵasy Erlan Qoshanov.
Onyń aıtýynsha, ótken sesıa «Kúshti Prezıdent - yqpaldy Parlament - esep beretin Úkimet» formýlasynyń tıimdiligin is júzinde dáleldedi. Bılik tarmaqtarynyń tepe-teńdigin qamtamasyz etetin bul júıe pármendi sheshimder qabyldaýǵa múmkindik týǵyzdy.
«Osynyń bári elimizdi odan ári damytýǵa, halyqtyń ál-aýqatyn arttyrýǵa baǵyttalǵan. Prezıdent jarıalaǵan «zań men tártip ústemdigi qaǵıdaty» ótken zań shyǵarý maýsymynda basty baǵdar boldy, qoǵamnyń sapaly zańdar qabyldaýǵa degen suranysyn arttyra tústi. Parlament elimizdegi eń ózekti problemalar boıynsha zańnamalyq sheshimder shyǵarý jáne olardy ashyq talqylaý alańyna aınaldy. Túıtkildi máselelerdi zańdar arqyly sheshý negizgi tetik retinde qalyptasyp keledi. Normatıvtik qujattardyń mártebesi men salmaǵy artyp otyr. Munyń bári - pármendi ári yqpaldy Parlament qalyptastyrý baǵytyndaǵy konstıtýsıalyq reformanyń mán-mańyzyn aıshyqtaı túsýde», - dedi Májilis tóraǵasy.
Bul turǵyda E. Qoshanov osy sesıada Parlamenttik jumys kezeńi tolyq ári tabysty atqarylǵanyn aıtty.