Arab Ámirlikteri Qazaqstanǵa ınvestısıa salyp, seriktestik ornatýǵa daıyn.
Óıtkeni bizdiń memleket arabtar úshin Ortalyq Azıa aımaǵyndaǵy senimdi strategıalyq seriktes. Qazaqstannyń tabıǵı resýrsy men ınfraqurylymdyq áleýeti mol, al Arab ámirlikteri energetıka, ınovasıa sıaqty salalarda biregeı tehnologıa men tájirıbege ıe, dep habarlaıdy Almaty-akshamy.kz. 24.kz-ke silteme jasap.
Mundaı tıimdi áriptestik, ásirese arab ınvestorlary úshin, tartymdy bolyp otyr. Metito – álemge sýdy qaıta paıdalaný, aǵyndy sýdy tazartý syndy ınjenerlik tyń tehnologıalarymen tanymal alpaýyt kompanıa. 65 jyldyq tájirıbesi bar uıym. Afrıka kontınenti elderi, Saýd Arabıasy, Qatar, Arab Ámirlikteri, Pákistan, Egıpet, jalpy sany 50-den astam elde sý tazartý máselesin sheship, jańartylatyn energıa kózin óndirýmen aınalysady.
Ramı Gandýr, "Metito" kompanıasynyń bas dırektory: - Jahandyq máselelerge áser etý, turaqtylyq jáne ınovasıa – bizdiń basty prınsıp. Qazaqstan da osyndaı ustanymda ekenin kórip otyrmyz. Azıa kontınentinde jedel damyp kele jatqan el retinde ári ınvestısıalyq tartymdylyǵyn eskere otyryp, biz qazir Qazaqstanmen áriptes bolýǵa umtylamyz.
Sheteldik ınvestor usynyp otyrǵan joba sý energetıkasyna tikeleı qatysty. Gıdroresýrs arqyly jańartylatyn energıa alý máselesi boıynsha sheteldik kompanıa Mańǵystaý jáne Kókshetaý óńirlerimen baılanys ornatqan.
Ramı Gandýr, "Metito" kompanıasynyń bas dırektory: - Prezıdent Toqaev myrza Ámirlikterdegi ınvestorlar kezdesýinde bizge naqty qandaı qadamdar jasaý kerektigin aıtty. Qazir Qazaqstannyń Ámirlikterdegi elshiliginiń qoldaýymen naqty salalyq mınıstrlermen baılanys ornady. Qarjylaı ınvestısıa salý boıynsha naqty shekteý joq, jobanyń kólemine baılanysty. Bastapqy kezeńde 10 mıllıon dollarǵa deıingi kólemde ınvestorlyq salym jasaýǵa daıyn otyrmyz.
Jalpy, Ámirliktermen áriptestik ornaǵaly beri Qazaqstanǵa 3 mıllıard 200 mıllıon dollar tikeleı ınvestısıa salynǵan. Sheteldik kapıtal úshin Qazaqstan barynsha qolaıly jaǵdaı jasap otyr. Dál qazir elimizde ámirlik ınvestorlarynyń qarajatyna 10-ǵa jýyq iri ınvestısıalyq joba júzege asyp jatyr.
Osy jyly da ınvestısıalyq salymnyń belsendiligi baıqalady. Infraqurylym, energetıka, kólik logıstıkasy jáne basqa da negizgi salalardaǵy yntymaqtastyq eki eldiń uzaq merzimdi damýyna yqpal etedi.
Qazaqstan respýblıkasynyń BAÁ-degi elshiliginiń ekinshi hatshysy: - Eki el arasynda qarjy qyzmetteri, farmasevtıka, energetıka, jańartylatyn energıa kózderi, logıstıka salalarynda yntymaqtastyqty damytýǵa úlken múmkindikter bar. 2022 jyldyń qorytyndysy boıynsha BAÁ nen Qazaqstanǵa tartylǵan tikeleı ınvestısıalardyń aǵyny 417 mıllıon dollaryna jetti.
Elder bir-birinen alshaq jatsa da, jyl óte ekpin alyp kele jatqan tyǵyz ekonomıkalyq qarym-qatynas bar. Ótken jyly elder 632 mıllıon dollarǵa taýar almasqan. Keler kúnde de Arab memleketi Ortalyq Azıadaǵy senimdi áriptes el – Qazaqstanmen tyǵyz baılanys ornatýǵa múddeli.
Istochnık: https://24.kz/kz/zha-aly-tar/ekonomika/item/614819-arab-mirlikteri-aza-stan-a-investitsiya-salu-a-m-ddeli
Lúboe ıspolzovanıe materıalov dopýskaetsá tolko prı nalıchıı gıperssylkı na www.24.kz