Qazaqstanda 800 mektep kitaphanasynyń modernızasıasy aıaqtalyp, 280 myńnan astam bala jańartylǵan resýrstarǵa qol jetkizdi, dep habarlaıdy aqshamnews.kz.
Bul týraly QR Oqý-aǵartý mınıstrliginiń baspasóz qyzmeti málimdeıdi.
Mektep kitaphanalarynyń materıaldyq-tehnıkalyq bazasyn nyǵaıtý 1000 aýyl mektebin modernızasıalaý baǵdarlamasynyń bir bóligi bolyp tabylady.
«Memleket jyl saıyn mektep ınfraqurylymyn jaqsartýǵa qarajat bóledi. Bıyl modernızasıa aıasynda 800 mektep kitaphanasy jańartylyp, olardyń qory jańa kórkem ádebıetpen tolyqtyryldy. Sonymen qatar, kitaphanalardaǵy jıhazdar jańartyldy», — dep atap ótti Infraqurylymdy damytý departamenti dırektorynyń orynbasary Roza Sembaeva.
Budan bólek, «Balalar kitaphanasy» jobasy aıasynda mektep kitaphanalaryn damytý jáne oqýshylardyń kitap oqýǵa degen qyzyǵýshylyǵyn arttyrý baǵytynda júıeli jumystar júrgizilýde. Búgingi tańda mektep kitaphanalarynyń qoryna 1,6 mıllıon dana kórkem ádebıet qosylyp, jalpy kitap qory 141 mıllıonnan asty.
Sondaı-aq, mektep kitaphanashylarynyń biliktiligin arttyrýǵa erekshe kóńil bólinýde. 2024 jyly 1 775 maman arnaıy kýrstan ótti, onyń ishinde 1 239-y mektep kitaphanashysy, 536-sy kolej kitaphanashysy. Bul shara kitaphana qyzmetkerleriniń kásibı deńgeıin kóterip, olardyń jumys sapasyn jaqsartýǵa yqpal etedi.
