Almaty polıseıleri tolǵaǵy qysqan áıeldi der kezinde perzenthanaǵa jetkizdi.
Almatyda taǵy bir qýanyshty oqıǵa boldy. Qalanyń patrúldik polısıa qyzmetkerleri der kezinde áreket etip, jas anaǵa sábıdi aman-esen dúnıege ákelýge kómektesti, dep habarlaıdy aqshamnews.kz.
Polısıa qyzmetkeri Asqat Mamedalynyń aıtýynsha, oqıǵa Ál-Farabı dańǵyly men Markov kóshesiniń qıylysynda bolǵan.
– Bizdi "Kia" avtokóliginiń júrgizýshisi toqtatyp, jubaıynyń tolǵaǵy bastalǵanyn aıtty. Ol bizden jol ashyp, perzenthanaǵa deıin ertip aparýdy ótindi. Dereý radıobaılanys arqyly kezekshi bólimge habar berip, medısınalyq mekemeni bosanatyn áıeldiń kele jatqanynan qulaǵdar ettik. Keshki ýaqyt, kólik keptelisi – jaǵdaı ońaı bolǵan joq. Degenmen, ýaqytpen jarysyp, perzenthanaǵa jetip úlgerdik. Bar-joǵy jarty saǵat ótkende náreste dúnıege keldi. Jas anany shyn júrekten quttyqtaımyz! – deıdi tártip saqshysy.
Polıseılerdiń aıtýynsha, anasy men náresteniń densaýlyǵy jaqsy, olar qazir dárigerlerdiń baqylaýynda. Belgili bolǵandaı, İnjý esimi berilgen kishkentaı qyz – otbasyndaǵy ekinshi bala. Ony úıinde ápkesi taǵatsyzdana kútip otyr.