Tótenshe jaǵdaılar mınıstrligi esik aldynda ot jaqqandarǵa qatysty birneshe eskertýler jarıalady. Bul shekteýlerdiń mamyrda kókke shyǵyp, káýap pisirýshilerge qatysy bar ma? Aqshamnews.kz tilshisi resmı jaýap aldy.
TJM ne deıdi?
Vedomstvo bergen jaýapqa sensek, saıajaı jáne baý-baqsha ýchaskelerinde ot jaǵýǵa, qoqystardy jaǵýǵa jáne órt týdyrýy múmkin qaýipti jumystardy júrgizýge tyıym salý jańa engizilgen norma emes. Órt qaýipsizdigi erejeleri 2006 jyldan bastap kúshine engen (08.02.2006 j. 140-tarmaq) jáne sáıkesinshe osy talaptardy buzǵany úshin belgilenetin ákimshilik jaýapkershilik te buryn bekitilgen.
«Qazirgi ýaqytta bul norma qoldanystaǵy Órt qaýipsizdigi qaǵıdalarynyń "Qurǵaq, ystyq jáne jeldi aýa raıy turaqty bolǵan jaǵdaıda qalalarda, aýyldyq eldi mekenderde jáne kásiporyndarda, saıajaılyq aýyldarda, baý-baqsha ýchaskelerinde ot jaǵýǵa, kómir, qoqys, qaldyqtar, qurǵaq shópti jaǵýǵa, órt qaýipti jumystardy júrgizýge, sondaı aq stasıonarlyq emes suıyq, qatty jáne gaz tárizdi otynmen jumys isteıtin peshterdi, as-úı oshaqtaryn jáne qazandyq qondyrǵylaryn jaǵýǵa jol berilmeıdi" 174-tarmaǵynda jazylǵan» delingen jaýapta.
Káýap pen ot jaǵýǵa qatysty qandaı tyıym bar?
• Qolaıly aýa-raıy jaǵdaıynda ǵımarattar men qurylystardan keminde 50 m qashyqtyqta, osy maqsattar úshin arnaıy bólingen oryndarda jáne turaqty baqylaýda ot jaǵýǵa jáne qaldyqtardy jaǵýǵa ruqsat etiledi.
• Al mangaldy (barbekúdi, grıldi) ǵımarattar men qurylystardan keminde 10 m qashyqtyqta paıdalanýǵa jol beriledi, sondaı-aq ornyn bir órt sóndirgishpen nemese keminde 10 lıtr sýy bar syıymdylyqpen jabdyqtaý qajet.
• Mangaldy (barbekúdi, grıldi) qurǵaq ósimdikteri bar oryndarda, aǵashtardyń túbinde, janǵysh materıaldardan jasalǵan jabyndardyń astynda ornatýǵa tyıym salynady.
Qansha aıyppul kózdelgen?
Bapqa sáıkes, órt qaýipsizdigi talaptaryn buzǵany úshin:
• 5 AEK-ten (19 660 teńge) – jeke tulǵalarǵa;
• 15 AEK-ten (58 980 teńge) – laýazymdy tulǵalarǵa, shaǵyn kásipkerlik sýbektilerine nemese komersıalyq emes uıymdarǵa;
• 25 AEK-ten (98 300 teńge) – orta bıznes úshin;
• 50 AEK-ten (196 600 teńge) – iri kásipkerlik sýbektileri úshin aıyppul salynady.