Almatylyq zeınetker taýǵa kún saıyn jaıaý shyǵady
77 jastaǵy Nıkolaı Reshetov zeınetke shyqqannan beri salaýatty ómir saltyn ustana bastaǵan. Jas kúninde bulaı shynyqpaǵan ol osylaısha onyń esesin toltyrmaq. Sońǵy jeti jyl boıy jattyǵý úzbeı jasap kele jatqan qarıa Medeý men Terenkýr boıynsha on shaqyrymǵa jýyq joldy júrip ótedi, dep habarlaıdy Almaty-akshamy.kz
24.kz saıtynyń aqparatyna júginsek, Nıkolaı Reshetovtyń mamandyǵy – dybys rejıseri. Búkil eńbek joly televıdenıe salasynda órildi. Respýblıkalyq telearnalardyń birinde taban aýdarmastan uzaq jyl qyzmet jasap, zeınetke shyqty. Kezinde jumysbasty bolyp, sportpen aınalysýǵa múldem ýaqyty bolmaǵan. Onyń ústine ózi de nıet bildirip, moıyn burmapty. Tipti saıabaqta qydyrýǵa ýaqyt taba almaǵan. Al zeınetke shyqqan soń ómir saltyn basqa baǵytqa burdy. Kún saıyn ondaǵan shaqyrymdy jaıaý júredi. Ásirese, taýǵa qaraı serýendeýdi ádetke aınaldyrǵan.
Osydan on jyl buryn Nıkolaı Reshetov abaısyzda aıaǵyn syndyryp alady. Oǵan osy oqıǵa da qatty áser etedi. Jaraqaty jazyla bastaǵan kezde dárigerler oǵan kún saıyn az da bolsa jaıaý júrýge keńes beredi. Sodan bastap ol kúndelikti úıinen Medeýge deıin jaıaý baryp, qaıtarda avtobýspen keletin. Bir kúni avtobýstan qalyp qoıǵan soń jaıaý qaıtýyna týra keledi. Sodan beri alys qashyqtyqty jeńil baǵyndyra bastaıdy.
«Kezinde júrýge ýaqytym bolmady... Kerisinshe, qazir sonyń ornyn toltyryp jatyrmyn. Men bárine jaıaý júrýge keńes beremin. Ár nárseni syltaýratýdyń qajeti joq. Ómir degen qozǵalys. Qozǵalys bar jerde aýrýǵa da oryn joq», - deıdi qala turǵyny Nıkolaı Reshetov.
Nıkolaı Reshetovtyń paıymdaýynsha, bir isti bastap ketýge eshqashan kesh bolmaıdy. Nıkolaı Reshetovtyń ustanymy osyndaı. Ol jaıaý júristiń artyqshylyǵyn aınalasyndaǵylarǵa únemi aıtyp otyrady. Sońǵy kezde taýǵa qyzy men nemeresi de birge shyǵyp júr. Zeınetker qazir sportpen qosa aǵylshyn tilin meńgerýdi qolǵa alǵan.