2021 jylǵy 1-8 qazan aralyǵynda Agroónerkásiptik keshendegi memlekettik ınspeksıa komıtetiniń aýmaqtyq ınspeksıalary Qazaqstan aýmaǵyna Reseıden, Qyrǵyzstannan, Polshadan, Lıtvadan jáne Irannan fıtosanıtarıalyq qaýpi joǵary karantınge jatqyzylǵan ónimdi zańsyz ákelýdiń 86 áreketin toqtatty, dep habarlaıdy almaty-akshamy.kz QR Aýyl sharýashylyǵy mınıstrligine silteme jasap.
«Karantındik fıtosanıtarıalyq baqylaýdy júrgizý kezinde Reseı Federasıasynan 803 tonna alma, banan, qyzanaq, kartop, qyryqqabat, burysh, qyzylsha, sábiz, bıdaı, un jáne basqa da ónimderdi fıtosanıtarıalyq sertıfıkatsyz ákelýi anyqtaldy. Qyrǵyzstan 2,7 tonna qulpynaı, tańqýraı, qurma jáne raýshan tamyryn fıtosanıtarıalyq sertıfıkatsyz ákelgeni jáne olardyń markırovkasyz ekeni belgili boldy. Polshadan 20,3 tonna alma fıtosanıtarıalyq sertıfıkatsyz jetkizilgen. Lıtvadan 19,9 tonna keshú jańǵaǵynyń karantınge jatqyzylǵan ónimdi ekinshi ret tekserýge usynbaǵan. Irannan 45,8 tonna alma ákelý kezinde fıtosanıtarıalyq talaptarǵa sáıkes kelmeýi anyqtaldy», - delingen QR Aýyl sharýashylyǵy mınıstrligi málimetinde.
Nátıjesinde kináli adamdar QR ÁQBtK-niń 400-baby boıynsha ákimshilik jaýapkershilikke tartylyp, olarǵa 4,2 mln teńge somasynda ákimshilik aıyppul salyndy.
«Jyl basynan beri QR Aýyl sharýashylyǵy mınıstrligi Agroónerkásiptik keshendegi memlekettik ınspeksıa komıtetiniń aýmaqtyq ınspeksıasy ósimdikter karantıni salasynda 5 myńnan astam zań buzýshylyqty anyqtap, nátıjesinde 367,2 mln teńge somasyna ákimshilik aıyppul salyndy», - dep atalyp ótken vedomstvo habarlamasynda.