Fransıa 76-Kann kınofestıvaliniń jeńimpazdaryn jarıalady. «Altyn pálma butaǵy» men festıváldiń Gran-prı júldesin Fransıa men Ulybrıtanıanyń rejıserleri aldy, dep habarlaıdy Almaty-akshamy.kz.
Massaget.kz málimeti boıynsha, «Altyn pálma butaǵy» fransýz rejıseri Jústın Trıege «Qulaý traektorıasy» (fr. Anatomie d'une chute) trılleri úshin berildi. Fılm kúıeýin óltirdi degen kúdikke ilingen nemis jazýshysy jáne erli-zaıyptylardyń soqyr uly is boıynsha jalǵyz kýáger ekendigi týraly baıandaıdy.
Trıe Kannǵa 2019 jyly da qatysqan. Onyń «Azǵyrý» fılmi bas syılyqqa usynylǵan bolatyn. Biraq sol jyly kınofestıval júldesi ońtústik koreıalyq rejıser Po Djýn Honyń «Parazıtter» fılmine berilgen edi.
Festıváldiń Gran-prı júldesi brıtandyq rejıser Djonatan Gleızerge «Qyzyǵýshylyq aımaǵy» (aǵ. The Zone of interest) dramasy úshin berildi. Bul fılm brıtandyq jazýshy Martın Amıstiń Osvensım konslageri komendantynyń óz laýazymynan jeke basyna paıdalanatyny týraly romanynyń negizinde túsirilgen.
Fransýz rejıseri Chan An Hýng Kanndaǵy eń úzdik rejıser atandy.
Nýrı Bılge Djeılannyń «Qurǵaq shóp týraly» (túr. Kuru Otlar Üstüne) fılminde basty róldi somdaǵan túrik aktrısasy Merve Dızdar «Úzdik aktrısa» júldesin jeńip aldy.
Úzdik senarı úshin syılyq «Monstr» dramasyn taspalaýǵa qatysqan japon dramatýrgi Iýdzı Sakamotoǵa buıyrdy.
Qazylar alqasynyń jeke júldesi fın rejıseri Akı Kaýrısmákıge «Túsken japyraqtar» ( (Kuolleet lehdet) fılmi úshin tabys etilse, vetnamdyq rejıser Thıen An Fam túsirgen «Sary kokon ishinde» (L'arbre aux papillons d'or) týyndysy úzdik debút dep tanyldy.
Japondyq Kodjı Iakýse áıgili nemis rejıserleriniń biri Vım Venderstiń jańa fılmi - «Ádemi kúnder» fılmindegi róli úshin Kanndaǵy «Úzdik akter» júldesin jeńip aldy. Tokıoda oryn alǵan fılm ártúrli jaǵdaılarǵa qaramastan óz ómirine qanaǵattanǵan Hıraıama esimdi dárethana jýýshy (Rolynda Kodzı Iakýse) týraly baıandaıdy.