Almatyda Halyqaralyq jastar kúnine arnalǵan aýqymdy ALMA LOVE jastar festıvali jalǵasyp jatyr. Joba Almaty qalasy Jastar saıasaty basqarmasynyń, qala ákimdiginiń jobalyq keńsesiniń qoldaýymen júzege asyrylyp, megapolıstiń barlyq aýdanyn qamtydy.
Festıvál aıasyndaǵy eń jarqyn oqıǵalardyń biri – ECO VIBE eko-chellendji men JasVibe mobıldi jobasy boldy. İs-shara jastardyń ekologıalyq mádenıetin damytýǵa, olardyń belsendiligin arttyrýǵa jáne qalada jaǵymdy atmosfera qalyptastyrýǵa baǵyttalǵan.
ECO VIBE chellendji aıasynda 300-den astam jas erikti Almatynyń 100-ge jýyq aýlasy men skverlerin tazalaýǵa shyqty. Bul ekologıalyq naýqan qala jastarynyń basyn qosyp, Almatyny taza ári jaıly etýge degen ortaq umtylysyn kórsetti. Qala kóshelerimen eko-dızaınmen bezendirilgen kólik júrip ótti. Onyń ishinde anımatorlar, blogerler men belsendiler boldy. Olardyń qatarynda tanymal eko-ambassador Dýlat Nábıev te bar. Komanda ınteraktıvti formatta turǵyndardy senbilikke atsalysýǵa shaqyryp, ony merekelik is-sharaǵa aınaldyrdy.
Tústen keıin Almaty qalasy Qoǵamdyq keńesiniń múshesi, ekolog Evgenıı Muhamedjanovtyń bastamasymen eko-festıval ótti. Qatysýshylar úshin vıktorınalar, sheberlik dáristeri, ınteraktıvti alańdar jáne ekologıa men turaqty damýǵa qatysty erkin pikir almasý uıymdastyryldy.
Almaty qalasy Jastar saıasaty basqarmasynyń basshysy Azız Qajdenbek bul jobanyń negizgi maqsaty qalany kórkeıtý jolynda jastardy naqty isterge jumyldyrý ekenin atap ótti. Onyń aıtýynsha, ECO VIBE jaı ǵana aksıa emes, taza Almaty úshin qozǵalysqa aınaldy.
Sonymen qatar qalada JasVibe jobasy da iske asyrylyp jatyr. Apta boıy arnaıy brendtelgen kólik pen Jas Almaty maskoty saıabaqtar men skverlerdi, qala kóshelerin aralap, turǵyndarǵa merekelik kóńil-kúı syılaıdy. Eriktiler almatylyqtardy Jastar kúnimen quttyqtap, jalaýshalar, bilezikter, ekosómkeler taratyp, Alma Love festıvaliniń fınaldyq konsertine arnalǵan sýperfan-aımaqqa bılet utysyn uıymdastyryp jatyr.
Jastar mundaı bastamalardy qoldaýdy sózben emes, naqty ispen dáleldep júr. Joba eriktisi Eldar Baıǵabylov oı bólisti. Onyń aıtýynsha, bastamanyń negizgi maqsaty qalaǵa qýanysh syılaý, turǵyndardy shahardyń qoǵamdyq ómirine tartý jáne jastardyń energıa, ıgi ister men ashyq kózqarastyń ıesi ekenin kórsetý.
Aıta keteıik, Almatyda 3 tamyzdan bastap Halyqaralyq jastar kúnin merekeleý onkúndigi bastalǵan bolatyn. ALMA LOVE festıvali 12 tamyzǵa deıin jalǵasady. Baǵdarlamada ekoaksıalar, sporttyq týrnırleri, kvestter, kórmeler, Open Mic konsertteri, bı batldary jáne belsendi jastardy marapattaý rásimderi bar. Festıváldiń sharyqtaý shegi 12 tamyz kúni Balýan Sholaq atyndaǵy sport kesheninde ótetin, qazaqstandyq estrada juldyzdarynyń qatysýymen bolatyn merekelik konsert bolmaq. Kirý – tegin