Tótenshe jaǵdaılar mınıstrliginde TJ vıse-mınıstri Batyrbek Ábdishevtiń tóraǵalyǵymen tótenshe jaǵdaılardyń aldyn alý jáne olardy joıý jónindegi vedomstvoaralyq memlekettik komısıanyń otyrysy ótti.
Otyrys barysynda elimizdiń seısmıkalyq qaýipsizdigin qamtamasyz etý máseleleri qaraldy, dep habarlaıdy aqshamnews.kz QR TJM-ge silteme jasap.
Otyrys beıneselektorlyq rejımde ortalyq memlekettik organdar ókilderiniń, oblystar, Almaty jáne Shymkent qalalary ákimderi orynbasarlarynyń, seısmıkalyq qaýipti óńirlerdegi TJD bastyqtarynyń qatysýymen ótti. Qatysýshylardyń baıandamalarynda seısmıkalyq qaýipsizdik jáne seısmologıalyq baqylaý jelisin jańǵyrtý máseleleri boıynsha jumystar qozǵaldy.
Tótenshe jaǵdaılar, sıfrlyq damý, ǵylym jáne joǵary bilim, ónerkásip jáne qurylys mınıstrlikteriniń, sondaı-aq jergilikti atqarýshy organdardyń basshylary seısmıkalyq qaýipsizdikti kúsheıtý jáne seısmologıalyq zertteýler ınfraqurylymyn damytý sharalaryn usyndy.
TJM TJ aldyn alý komıteti tóraǵasynyń orynbasary Aıbol Aqparov atap ótkendeı: «Elimizdiń respýblıkalyq mańyzy bar 2 qalasy men 13 óńiri seısmıkalyq qaýipti. Seısmıkalyq qaýipsizdik problemalaryn keshendi sheshý úshin QR Úkimetiniń Qaýlysymen seısmologıalyq salany damytýdyń 2024-2028 jyldarǵa arnalǵan Keshendi jospary bekitildi. Osy jospar aıasynda seısmıkalyq táýekelin baǵalaý jáne jer silkinisterinen bolatyn zalaldy boljaý, monıtorıń jelisin keńeıtý kózdelgen».
Sonymen qatar TJM «Azamattyq qorǵaý týraly» Zańyna ózgerister engizý sheńberinde memlekettiń, kásipkerlerdiń jáne halyqtyń osy saladaǵy ózara qarym - qatynasyn retteıtin jeke taraý engizýdi usyndy.
Otyrys qorytyndysy boıynsha vıse-mınıstr Batyrbek Ábdishev múddeli memlekettik organdar men uıymdarǵa jetekshilik etetin baǵyttar boıynsha adamdardyń qaýipsizdigin qamtamasyz etýge baǵyttalǵan uıymdastyrýshylyq jáne praktıkalyq is-sharalar keshenin júrgizýdi, seısmıkalyq qubylystardyń aldyn alý jáne áserin azaıtý jónindegi jumysty kúsheıtýdi tapsyrdy.
Otyrys sońynda hattamalyq sheshim qabyldandy.