Der kezinde jasalǵan ota mıdaǵy anverızma tamyry úzilgen naýqastyń ómirin saqtap qaldy
Almatydaǵy №7 Qalalyq klınıkalyq aýrýhana dárigerleri kezekti kúrdeli ota jasap, bir adamdy ajaldan arashalap aldy. Aýrýhananyń nevropatolog, ınsýltolog jáne qan-tamyr hırýrgteri anevrızmaǵa shaldyqqan tamyry úzilip, mıyna qan ketken pasıentke keshendi kómek kórsetti.
39 jastaǵy pasıent aýrýhanaǵa asa aýyr halde jetkizilgen. Jedel járdemmen kelgen kezde onyń basy men moıyn tusy aýyryp, jaryqqa qaraı almaǵan, qan qysymy da qatty kóterilip ketken, dep habarlaıdy almaty-akshamy.kz aýrýhananyń baspasóz qyzmetine silteme jasap.
«Qabyldaý bóliminde birden tekserý júrgizildi. Kompúterlik tomografıa barysynda mıǵa qan quıylǵany belgili boldy. Nevropatolog pen neırohırýrgter estip-qabyldaý, túısiný qabiletiniń de nasharlaǵanyn anyqtady», - deıdi qabyldaý bólimi meńgerýshisi Asylbek Emberdıev.
Mýltıdısıplınarlyq tekserýden keıin selektıvti serebraldy angıografıa jasaý týraly sheshim qabyldandy.
«Angıografıa barysynda mıdyń aldyńǵy dáneker tinderinen qapshyq tárizdes anevrızma tabyldy. Birden embolızasıa jasaldy. Sonymen qatar, anevrızmge shaldyqqan tamyrdyń tóbesinde dıvertıkýl (tamyrdyń óte jińishke ári jarylýǵa beıim tusy) baryn baıqadyq. Otadan keıin pasıent jansaqtaý bólimine aýystyryldy. Jaǵdaıy turaqtanǵan soń №1 ınsýlt bólimshesine kóshirildi», - deıdi qan-tamyr neırohırýrgıasy bólimshesi meńgerýshisiniń m.a. Qýanysh Nıkatov.
Operasıa mindetti áleýmettik medısınalyq saqtandyrý esebinen jasaldy. Qazir 39 jastaǵy naýqas otbasyna oraldy. Pasıenttiń aıaqqa turýyna qan-tamyr neırohırýrgi – Qýanysh Nıkatov, Aıbek Turalıev, anestezıolog – Oleg Býdakov, operasıalyq medbıke – Aınur Nuralıev syndy operasıalyq blok brıgadasy, Insýlt bólimshesiniń dáriger-nevropatologtary Jandos Zarpýllaev pen Oksana Antonúk atsalysty.
Qabyldaý bóliminiń nevropatolog mamany men qan-tamyr hırýrgteriniń birlesken jumysy nátıjesinde pasıent tıisti tekserýlerden ótkizildi, durys dıagnoz qoıylyp, operasıa jasaldy. Sonymen qatar, ota jasalǵanyna qaramastan, mıǵa qan quıylǵannan keıin 14-shi jáne 21-kún aralyǵynda mıdyń ortańǵy kúretamyry tarylyp, spazm qalyptasý qaýpi paıda bolady. Osynyń aldyn alǵan bólimshe ınsýltologynyń da eńbegi zor.
№7 aýrýhananyń ınsýlt ortalyǵy İİİ-deńgeıli ortalyqtar qataryna jatady. Onda ınsýlt alǵan pasıentterge joǵary tehnologıaly medısınalyq kómek kórsetiledi. Sonyń ishinde úzilgen anevrızmaǵa angıografıalyq apparattyń kómegimen endovaskýlárlyq ota jasalady. Emdeý-dıagnostıka mýltıdısıplınarlyq prınsıp boıynsha júrgiziledi. Oǵan erte ońaltý, ınsýlttiń qaıtalanýyna jol bermeýge baǵyttalǵan sharalar kiredi. Aýrýhana mamandary sondaı-aq, aýyr haldegi naýqastarǵa konsýltasıa berip, em-dom taktıkasyn anyqtaý úshin basqa qalalarǵa da shyǵyp turady.
Dárigerlerdiń aıtýynsha, mıyna sýbarahnoıdaldy qan quıylǵan pasıentterdiń 80 paıyzynda mıdan qapshyq tárizdes anevrızma tabylady. Jáne ol tek operatıvti jolmen emdeýdi talap etedi. Ádette, mıdaǵy qan tamyrlarynyń anevrızmasy kóp jaǵdaıda eshqandaı belgi bermeıdi. Kóbine bul dıagnoz pasıent nevropatolog mamandarǵa qaralǵan kezde aıaq-astynan anyqtalyp jatady. Statısıkaǵa sáıkes, anevrızmaǵa shaldyqqan tamyr jarylǵan 10 naýqastyń 4-eýi stasıonarǵa jete almaıdy. Anevrızma ekinshi ret úzilgen jaǵdaıda pasıenttiń ómirine tónetin qaýip eselene túspek.