Almaty oblysy İle aýdandyq bilim bóliminiń basshysy sybaılas jemqorlyqqa qatysy bar degen kúdikke ilindi, dep habarlaıdy almaty-akshamy.kz
Almaty oblysy boıynsha Sybaılas jemqorlyqqa qarsy qyzmet «Almaty oblysy İle aýdanynyń bilim bólimi» memlekettik mekemesiniń basshysyna qatysty sotqa deıingi tergeý amaldaryn júrgizýde.
«Mekeme basshysy İle aýdanyndaǵy jalpy bilim beretin mektepterde jumys istemegen tulǵalarǵa jalaqy jazyp, aldyn ala sóz baılasý arqyly 680 mln teńge kóleminde búdjet qarajatyn jymqyrdy degen kúdikke ilindi. Sonymen qatar, ol óziniń qyzmettik ókilettigin asyra paıdalanyp, júrgizýshisin jalǵan túrde mektep-gımnazıasyna kásiptik baǵdar berý jónindegi keńesshi etip jumysqa ornalastyryp, oǵan jalpy somasy 4,9 mıllıon teńge zańsyz jalaqy tólegen», - dep habarlady Almaty oblysy boıynsha Sybaılas jemqorlyqqa qarsy qyzmeti.
Sottyń sanksıasymen kúdikti qamaýǵa alyndy. Tergeý jalǵasyp jatyr.
Qylmystyq is júrgizý kodeksiniń 201-babyna sáıkes, tergeý múddesin kózdeıtin ózge aqparat jarıalaýǵa jatpaıdy.