Almaty qalasy Tórtinshi qalalyq aýrýhananyń qyzmetkerleri 28 lıtr qan tapsyrd
Búgin №4 qalalyq klınıkalyq aýrýhanada «Donor bol – ómir syıla» atty shara ótti. Aýrýhana qyzmetkerleri 28 lıtr qan tapsyrdy.
Donorlyq aksıaǵa qatysýǵa barlyǵy 90 adam nıet bildirdi. İrikteý nátıjeleri men densaýlyq jaǵdaıy boıynsha 61 adamǵa qan tapsyrýǵa ruqsat berildi.
«Bıyl bizdiń ujym «Donor bol» aksıasyna ekinshi ret qatysyp otyr, sáýir aıynda klınıkada ótken naýqanda qyzmetkerlerimiz 27 lıtr qan men onyń komponentterin tapsyrdy. Donorlyq qan quıýdy qajet etetin adamdardyń ómirin aman alyp qalýǵa kómektesetinin túsiný kerek. Naýqasqa qan jazataıym oqıǵa, operasıa, bosaný jáne basqa da medısınalyq prosedýra kezinde qajet bolýy múmkin. Qan men onyń quramdas bólikteri anemıa, qaterli isik, gemofılıa jáne t.b. túrli aýrýlardy emdeýge qajet bolady», - deıdi No4 qalalyq klınıkalyq aýrýhana dırektorynyń orynbasary Tımýr Raımjanov.
Tórtinshi qalalyq aýrýhana elimizde jedel travmatologıalyq jáne hırýrgıalyq kómek kórsetetin flagman retinde tanymal. Aýrýhana dárigerleri gemotransfýzıaǵa - naýqasqa qan men onyń komponentterin quıýǵa jıi júginedi. Munda táýligine 2 lıtrge jýyq qan quıylady.
Donor qany kelesi jaǵdaıda adam ómirin aman alyp qalýy múmkin:
- jaraqat, operasıa nemese bosaný saldarynan qan joǵaltý kezinde;
- temir, dárýmender nemese basqa qorektik zattardyń jetispeýshiliginen týyndaǵan anemıa kezinde;
- leıkoz, lımfoma, mıeloma jáne basqa qan aýrýlary kezinde;
- qan uıýynyń buzylýymen baılanysty gemofılıa jáne basqa da tuqym qýalaıtyn aýrýlar kezinde;
- qannyń joǵalýyna nemese qantúzý músheleri qyzmetiniń buzylýyna ákeletin isik aýrýlary kezinde;
- sepsıs nemese bezgek sıaqty jedel juqpaly aýrýlar kezinde;
- qaterli isikti emdeý, organdardy transplantasıalaý nemese basqa medısınalyq prosedýralarda qan qajettiliginiń artýy kezinde.
Qan tapsyrý – adam ómirin saqtap qalýǵa jáne aýrýmen kúresýge kómektesetin óte mańyzdy proses. Qan donory bolǵyńyz kelse, qalalyq qan ortalyǵyna habarlasyńyz.