«Parı Sen-Jermen» klýbynyń shabýylshysy Kılıan Mbappe sanaýly kúnderden keıin komandadan ketedi. Osyǵan baılanysty ol áleýmettik jelide emosıaǵa toly jazba qaldyrdy, dep habarlaıdy almaty-akshamy.kz
Aıta keteıik, Mbappe bıyl Fransıa chempıonatynyń eń úzdik oıynshysy atanǵan bolatyn. Munan keıin ol klýbtan ketetini týraly vıdeomálimdeme jasaǵan.
«Lıga 1-diń eń úzdik oıynshysy degen tıtýldy besinshi ret alyp, tolqyp otyrmyn. Osy jyldar ishinde alǵan mahabbatym úshin barshańyzǵa alǵys aıtqym keledi. Klýbpen birge bolǵan erekshe sátterdi eshqashan umytpaımyn. Meniń árdaıym úzdik bolýyma kómektesken komandadaǵy dostaryma, «PSJ» klýbynyń qyzmetkerlerine alǵys aıtamyn. Men basymdy tik kóterip ketip baram», - dep jazdy Mbappe.
Fransýz fýtbolshysynyń qandaı klýbqa aýysatyny ázirge belgisiz. Buǵan deıin sport ınsaıderleri onyń «Realmen» kelisimge kelgenin habarlaǵan bolatyn. Buǵan baılanysty Mbappeniń ózi áli tis jarǵan joq.