Jelilerdi tartý jáne aýlalardy jóndeý: Almaty ákimimen kezdesýde aıtylǵan qala turǵyndarynyń máselesi qalaı sheshilip jatyr
Almaty ákimi Erbolat Dosaev Áýezov aýdanynyń turǵyndarymen kezekti kezdesý ótkizdi. Qala ákimdiginiń baspasóz qyzmetinde 2023 jyldyń qyrkúıeginde aýdan turǵyndarymen kezdesýde megapolıs basshysynyń bergen tapsyrmalary týraly aıtyldy.
- Sonymen, burynǵy «Vosqod», «Sadovod», «Ardager» baý-baqsha seriktestikteriniń turǵyndary talaıdan beri aıtylyp kele jatqan káriz jelilerin tóseý máselesin kóterdi. Sonyń nátıjesinde 8 kóshede 117 jeke úıdi nemese 470 turǵyndy qamtıtyn uzyndyǵy 5,2 shaqyrym jeliler salyndy. Búgingi tańda abonentterdi qosý jumystary qolǵa alynǵan, ol naýryz aıynda bitedi.
- Buǵan qosa, Saıyn jáne Ulyqbek kósheleriniń aýmaǵynda sý qubyry jelilerin qaıta jańartýdyń aıaqtalmaı qalýy alańdaýshylyq aıtyldy. Qorytyndysy boıynsha ótken jyldyń sońyna deıin qaıta jańartý aıaqtaldy, asfált jabyny osy jyldyń birinshi toqsanynda qalpyna keltiriledi.
- Aýdan halqynyń ótinishi boıynsha josparlanǵan 23 myńnyń ornyna jalpy aýdany 56 myń sharshy metr bolatyn 47 kóshedegi joldar aǵymdaǵy jóndeýden ótti. Sonymen qatar, uzyndyǵy 11,4 km bolatyn 12 kóshege ortasha jóndeý júrgizildi, Saıyn kóshesindegi 4 jer asty ótkeli jóndeldi. Beregovoı jáne Iý.Kım kósheleriniń qıylysynda baǵdarsham kesheni salyndy.
- 7, 8, 9, 10,11, 12, Jetisý-1,2,3,4 shaǵyn aýdan turǵyndarynyń aýla aýmaqtaryn kúrdeli jóndeýdiń merzimine qatysty alańdaýshylyǵy boldy. Sonyń nátıjesinde qarasha aıynda oıyn alańdaryn, trenajerlerdi ornatýmen, jaryqtandyrýdy jańartýmen jáne taǵy basqalarmen 161 aýlany kúrdeli jóndeý aıaqtaldy. Buǵan qosa, 58 aýla aýmaǵy aǵymdaǵy jóndeýden ótti.
- Ári TKSH jańǵyrtý baǵdarlamasy aıasynda 38 úıde shatyr men ınjenerlik jeliler jóndelip, 57 úıde 102 jedelsaty aýystyryldy. Sáýlettik jaryqtandyrý ornatylyp, bes úıdiń qasbetine jóndeý júrgizildi.
Sonymen qatar, qala ákiminiń tapsyrmasymen aýdannyń aýlalarynda, saıabaqtarynda jáne skverlerinde qoǵamdyq qaýipsizdikti arttyrý maqsatynda jyl qorytyndysy boıynsha 800-ge jýyq beınekamera ornatyldy.