Ózge ulttyq quramalar sıaqty qazaq kúresiniń balýandary da Kóshpendiler oıyndaryna qyzý daıyndyq ústinde.
Jyl basynan beri ulttyq qurama sportshylarynyń qatysýymen 4 oqý-jattyǵý jıyny ótti. Atap aıtqanda, balýandar buǵan deıin Almaty qalasynda eki márte, Grýzıa elinde jáne Qyrǵyzstanda daıyndyqtaryn júrgizdi, dep habarlaıdy aqshamnews.kz .
Qazirgi ýaqytta kezekti oqý-jattyǵý jıyny 1-14 tamyz aralyǵynda Aqmola oblysynyń Shýche qalasynda ótýde. Bul oqý-jattyǵý jıyny barysynda balýandardyń arasynda qorytyndy beldesýler ótkizilip, ár salmaqtyń úzdikteri anyqtaldy.
Sóıtip, 5-shi Dúnıejúzilik Kóshpendiler oıyndaryna kelesi balýandar irikteldi:
Erler – Tólepov Bekjan (55 kg, Jetisý obl.), Bereketov Meıirjan (60 kg, SQO), Tuqyshev Dıdar (66 kg, Abaı obl.), Qojambekov Jumajan (74 kg, Shymkent q.), Seıitqazynov Ersin (82 kg, Abaı obl.), Janataev Erasyl (90 kg, Almaty q.), Muzapparov Ersultan (100 kg, Shymkent q.), Jarylǵapov Nurdáýlet (+100 kg, Mańǵystaý obl.).
Áıelder – Jylqybaeva Aıjan (48 kg, Túrkistan obl.), Azamatova Nazerke (52 kg, Aqtóbe obl.), Nurmahammetova Raýza (56 kg, Jambyl obl.), Qusaqbaeva Baqyt (60 kg, Aqtóbe obl.), Sarıpova Zarına (65 kg, Abaı obl.), Nysantaıqyzy Roza (70 kg, Abaı obl.), Faızollanova Zámzágúl (77 kg, Shymkent q.), Bahıeva Albına (+77 kg, Shymkent q.).
Qazaq kúresinen QR ulttyq quramasynyń bas bapkeri Ǵanı Keldiqulovtyń aıtýynsha, keshendi oıyndary aldyndaǵy sońǵy oqý-jattyǵý jıyny 27 tamyz ben 7 qyrkúıek aralyǵynda Astana qalasyndaǵy Jaqsylyq Úshkempirov atyndaǵy Jekpe-jek saraıynda ótedi.
– Qazaq kúresinen QR ulttyq quramasy keshendi oıyndarǵa daıyndyq aıasynda besinshi oqý-jattyǵý jıynyn ótkizip jatyr. Jalpy sportshylarymyz orta taý bókterinde jalpy dene daıyndyqtaryn ótkizip, sheteldik balýandarmen tájirıbe almasqan bolatyn. Sportshylar aldaǵy mańyzdy jarysqa fızıkalyq turǵydan da, tájirıbe jaǵynan da tolyqtaı daıyn dep oılaımyn. Al sońǵy oqý-jattyǵý jıynynda salmaq qýý jáne qalypqa kelý jumystaryna basymdyq beriletin bolady. Osyndaı iri jarystyń bizdiń balýandarymyzǵa úlken jaýapkershilik júkteıdi. 5-shi Dúnıejúzilik Kóshpendiler oıyndarynda sportshylarymyzdyń el namysyn abyroımen qorǵap, júldegerlerdiń qatarynan kóriný úshin baryn salatynyna senimdimin, – deıdi Ǵanı Qudaıbergenuly.
Bas bapkerdiń sózine qaraǵanda 5-shi Dúnıejúzilik Kóshpendiler oıyndarynda iriktelip, 16 salmaq dárejesinde el namysyn qorǵaıtyn balýandardyń 50 paıyzdan astamy jeńistiń birinshi satysynan kórýi ábden múmkin. Aıta ketsek, jyldyń eń mańyzdy ári aýqymdy álemdik sporttyq sharasyna 89 elden 2000-nan astam sportshy qatysady. Astanadaǵy jarystyń baǵdarlamasyna 21 sport túri kirse, onyń 12 ulttyq sportymyz.