Sergek ITS sarapshylary jol boıyndaǵy jolaqtardyń arasynda birinshisinen ekinshisine jıi aýysyp, gaz ben tejeýishti jyldam basatyn júrgizýshilerdiń qansha ýaqyt utatynyn anyqtady, dep habarlaıdy aqshamnews.kz.
Intellektýaldy kóliktik taldaý, monıtorıń jáne kóliktik boljaý júıesiniń málimetteri boıynsha agressıvti kólikterdiń «utatyn» ortasha ýaqyty nebári 42 sekýndty quraıdy. Zertteý Almatyda bir apta boıy ál-Farabı dańǵylynyń shyǵys baǵyttaǵy 16,5 km ýchaskesinde júrgizildi. Agressıvtilik krıterııi retinde kelesi parametrler alyndy: júrgizýshi bir jolaqtan ekinshisine bir retten kóp aýysýy, ortasha jyldamdyǵy 50 km/saǵ-tan joǵary jáne jyldamdyqty 65 km/saǵ-tan kúrt údetýi.
Taldaý júrgizilgen aptada atalǵan ýchaskede 66 myńnan astam kólik ótti, onyń 22 myńy agressıvti júrgizý túrin kórsetti. Bunyń 6 myńy taksı júrgizýshileri. Sonymen qatar, jalpy kólikterdiń 23,5% kem degende bir ret agressıvti júrgizýshi belgisin kórsetip, al 9,5% — muny turaqty túrde jasaǵan.
«Agressıvti» júrgizýshi men «qaýipti» júrgizýshi sıaqty uǵymdardy ajyrata bilý kerek. Qaýipti júrgizýshiden aıyrmashylyǵy, agressıvti júrgizýshi óreskel tártip buzbaıdy, biraq onyń manevrleri arqyly basqa jol qozǵalysyna qatysýshylarǵa yńǵaısyzdyq týǵyzady, apatqa ushyraý qaýpin arttyrady. Júrgizýshiler bar bolǵany 42 sekýnd únemdeý úshin óziniń jáne ózgeniń ómirin qaterge tigý kerek pe degen suraqqa oılanyp kórgeni jón», - dep atap ótti kompanıa.
Esterińizge sala keteıik, Sergek ITS (Intelligent Transportation System) - qazaqstandyq mamandardyń ázirlemesi. Bul qaladaǵy keptelisterdiń sebepterin anyqtaýǵa, qoǵamdyq kólikterdiń tıimdi marshrýttary men kestelerin jasaýǵa, qalalyq ınfraqurylymdy josparlaýdy ózgertýge, sondaı-aq onyń sebepterin túsinýge múmkindik beretin jáne adamdardyń maıatnıktik kóshi-qonyna saraptama jasaıtyn taldaý, baqylaý jáne kóliktik boljamdarǵa arnalǵan ıntellektýaldy kólik júıesi.
Bǵan deıin, Qazaqstandaǵy keıbir júrgizýshiler saqtandyrý úshin qosymsha aqy tóleýge májbúr bolatyny týraly jazǵan edik.