22 qazanda Almaty qalasyn abattandyrý jobalary boıynsha onlaın daýys berý bastaldy. Bul proses 2024 jyldyń 1 qarashasyna deıin jalǵasady, dep habarlaıdy aqshamnews.kz
«Halyq qatysatyn búdjet» baǵdarlamasy aıasynda turǵyndar qalany kóriktendirý boıynsha ózderine unaıtyn jobalardy qoldaý múmkindigine ıe bolady.
Daýys berý budget.open-almaty.kz portalynda júzege asyrylady. Portaldyń basty betinde qatysýshylar úshten aspaıtyn jobany tańdap, óz daýysyn berý úshin elektrondyq sıfrlyq qoltańba (ESQ) nemese SMS-kod arqyly rastaý jasaı alady.
Qalanyń árbir eresek turǵyny, turaqty turýǵa yqtıarhaty bar bolsa, jobalarǵa daýys bere alady. Jalpy, megapolıstiń turǵyndarynan 6118 ótinish tústi, olardyń ishinde 1402 joba daýys berýge ruqsat aldy. Eń kóp daýys jınaǵan jobalardy aýdan ákimdikteri 2025 jyly iske asyrady.
«Halyq qatysatyn búdjet» baǵdarlamasy týraly qosymsha aqparat pen keńesterdi aýdan ákimdikterinen nemese Almaty Open Almaty Qoǵamdyq qabyldaý bólmesinen 224 39 29 telefony arqyly (ishki tel. 203) alýǵa bolady.
Almaty ákimi Erbolat Dosaevtyń tapsyrmasyna sáıkes, 2024 jyly «Halyq qatysatyn búdjet» baǵdarlamasynyń qarjylandyrýy 18,8 mlrd teńgege deıin óskenin eske salamyz (2023 jyly — 12,9 mlrd). Aýdan ákimdikteri 2023 jylǵy jeńimpaz jobalardy júzege asyrýdy jalǵastyryp jatyr, búginge deıin 261 joba iske asyryldy.