Armani kompanıasynyń negizin qalaǵan ıtalıalyq modeler ári kásipker Djordjo Armanı 91 jasynda ómirden ótti. Qaıǵyly habardy Armani Group jetkizdi. Djordjo Armanı qalaı Italıanyń eń baı adamdarynyń birine aınaldy? Onyń esimi nege tabystyń sınonımine aınaldy? Aqshamnews.kz redaksıasy Armanı týraly siz bilmeıtin qyzyqtardy jınap shyqty.
Brend qyzmetkerleriniń aıtýynsha, kásipker ómiriniń aıaǵyna deıin jańa koleksıalar shyǵarǵan. Alaıda 2 qyrkúıekte densaýlyǵyna baılanysty brendtiń negizgi jumysyn ózge adamdarǵa tapsyratynyn málimdedi.
Keıingi 50 jyl boıy Armanı ózin sán ındýstrıasyna tolyq arnady. Ol birneshe iri jobany jasaımyn josparlaǵanymen, olardy aıaqtap úlgermedi.
"Meniń josparym – únemi ózim kóterip kelgen jaýapkershilikti birtindep maǵan eń jaqyn adamdarǵa tapsyrý. Olardyń arasynda Leo Dell'Orko, otbasymnyń músheleri men jumys toby bar", – dep aıtqan edi dızaıner suhbattarynyń birinde.
Symbat pen kúltke aınalǵan esim
Kóbi Djordjo Armanıdi talǵampazdyqpen, qarapaıymdyqpen jáne minsiz stılmen baılanystyrylady. Qazir ony sán ıkonasy, sılýet sheberi jáne arhıtektýra ustasy dep ataıdy. Biraq kópshilik onyń tabys joly sán sahnasynan bastalmaǵanyn bile bermeıdi. 1960 jyldardyń basynda Armanı Mılandaǵy La Rinascente ámbebap dúkeninde qarapaıym kómekshi bolyp jumys istedi. Onyń arnaıy bilimi de, yqpaldy tanystary da bolmaǵan.
Jastaıynan Djordjo jalǵyz júrýdi unatatyn, kópshilik aldyna shyqqandy unatpaıtyn. Bul minezi bastapqyda kedergi sıaqty kóringenimen, keıinnen onyń basty artyqshylyǵyna aınaldy. Ol álemge sán shýsyz-aq máńgilik bola alatynyn dáleldedi.
Medısınadan sánge: alǵashqy qadamdar
Jastyq shaǵynda Armanı dáriger bolýdy armandady. Áskerde júrgende ony Veronadaǵy gospıtálǵa jibergen, bul oǵan medısınalyq fakúltetke túsýge túrtki boldy. Biraq úsh jyl oqyǵan soń bul mamandyqtyń ózine saı emesin túsinip, ýnıversıtetten ketti.
Budan keıin Djordjo La Rinascente dúkeninde jumys isteı bastady. Tabıǵı talǵamy men ásemdikke degen sezimi onyń mansabyn ósirdi: ol kómekshiden vızýal merchendaızerge, keıinnen stılıs-konsýltantqa deıin kóterildi.
Jetken tájirıbesine súıenip, batyl sheshim qabyldap, kıim dızaınyn jasap kórýge bel býdy. Osylaısha Armanıdiń sán álemindegi joly bastaldy. Ol mılandyq ataqty modeler Nıno Cherrýtıdiń qol astyna jumysqa turyp, dızaın sheberligin shyńdady. Qarapaıymdylyǵyna qaramastan, Armanı tabandylyq tanytyp, isine adaldyǵyn kórsetti.
Giorgio Armani brendi: óz isin bastaý
Armanıdiń mansabyndaǵy betburys sát onyń isker seriktesi Serdjo Galeottımen birge óz brendin qurý týraly sheshim qabyldaǵan kezde bastaldy. Bastapqyda jınaǵan jáne satqan kóliginen túsken aqshasyn qoldanǵan. Sóıtip, 1975 jyly Giorgio Armani brendi alǵashqy koleksıasyn shyǵardy.
Bul toptama birden kózge tústi. Syzyqtar, monohrom túster palıtrasy men ustamdy symbattylyq onyń aıryqsha belgisine aınaldy. Klasıkaǵa jańa kózqaras dızaınerge tez arada tanymaldyq ákeldi. Arhıtektýralyq sılýetter men mınımalızm arqasynda Armanı óz brendine tán qaıtalanbas stıl qalyptastyrdy.
Armanı jáne Gollıvýd: sán kıno ónerinde
Brendtiń damýyna Gollıvýdpen áriptestik úlken ról atqardy. Armanı kostúmderdi tek tigip qoıǵan joq, olardy keıipkerlerdiń minezin ashatyn elementke aınaldyrdy. Onyń alǵashqy jobalarynyń biri – «Amerıkalyq jıgolo» fılmindegi Rıchard Gırdiń obrazy. 1980 jylǵy ataqty kóriniste basty keıipkerdiń Armani pıdjaktaryn tańdap jatqan sáti jańa erler sániniń belgisine aınaldy.
Keıin dızaıner «Maıamı polıseıi» serıalyna jumys istep, «Jaǵalaýdaǵy tyńshylar», «Volk s Ýoll-strıt» sıaqty 200-den asa fılmge kostúmder tikti. Bul arqyly Armanı Gollıvýdtaǵy eń yqpaldy sán rejıserleriniń birine aınaldy.
Qyzyl kilem jáne Armanı
Kınoındýstrıamen baılanys Armanıge álemdik juldyzdarmen tyǵyz jumys isteýine jol ashty. Onyń týyndylary qyzyl kilem sánine aınaldy. Djýlıa Roberts, Daıan Kıton, Mıshel Pfaıffer, Keıt Blanshett, Sofı Loren, Sındı Kroýford, Beıonse, Ledı Gaga, Kıfer Sazerlend, Djodı Foster, Rıchard Gır sıaqty juldyzdar Armanıdiń kıimderin tańdady. Minsiz pishin men ustamdy, biraq áserli stıl onyń kıimin halyqaralyq deńgeıdegi sımvolǵa aınaldyrdy.
Giorgio Armani ımperıasy: sánnen de aýqymdy
Qazir Giorgio Armani brendi sánnen bólek jıhaz, parfúmerıa, meıramhana jáne qonaqúı bıznesin qamtıtyn tutas álemge aınaldy. Arhıtektýra, kosmetıka, zergerlik buıymdar men aksesýarlar da ımperıasynyń bóligine aınaldy.
Qazir onyń eksklúzıv bólshek saýda jelisi 37 eldi qamtydy:
-
Giorgio Armani – 59 býtık;
-
Armani Collezioni – 11 dúken;
-
Emporio Armani – 122 dúken;
-
A/X Armani Exchange – 71 dúken;
-
AJ | Armani Jeans – 13 dúken;
-
Armani Junior – 6 dúken;
-
Giorgio Armani Accessori – 1 dúken;
-
Armani Casa – 17 dúken.
Barlyǵy – 386 dúken.
Densaýlyǵy
2025 jyl Armanı úshin ózgeristerge toly boldy. Ol mansabynda alǵash ret densaýlyǵyna baılanysty sán kórsetilimderine qatysa almady. Maýsymda dızaıner Mılanda aýrýhanaǵa tústi.
Bir aıdan soń Parıjdegi kórsetilim aldynda Djordjo bronhıtke shaldyǵyp, dárigerler oǵan sapardan bas tartýdy usyndy. Osylaısha ol 20 jylda alǵash ret Parıj shoýyn jiberip aldy.
2021 jyly 86 jasynda Armanı aýyr jaraqat alyp, kınoteatr satysynan qulap, sol jaq ıyq súıegin syndyryp aldy. Ol aýrýhanada eki apta jatyp, qolyna 17 tigis saldyrdy.
Aıta keteıik, keshe aty ańyzǵa aınalǵan ıtalıalyq dızaıner Djordjıo Armanı 91 jasynda dúnıeden ótkeni belgili boldy.
"Brendtiń negizin qalaýshy ári shabyt berýshimiz Djordjıo Armanıdiń ómirden ozǵanyn aýyr qaıǵymen habarlaımyz. Ol sońǵy kúnine deıin tynymsyz eńbek etip, kompanıasyna, toptamalaryna jáne túrli jobalaryna bar jan-tánin arnady", – dep málimdedi Armani Group ujymy.