5 qyrkúıek – Qazaqstan halqynyń tilderi kúni. QR İİM Ulttyq ulanynyń Almatydaǵy 5571 áskerı bólimi sapynda qyzmet etip júrgen qatardaǵy sarbaz Vladımır Kopylov bes til biledi.
Ulty – orys bolsa da, qazaq tilin jetik bilip qana qoımaı, ózbek, qyrǵyz, uıǵyr jáne tatar tilderinde erkin sóıleıdi. Ulttyq ulan qataryna Shymkent qalasynan shaqyrylǵan Vladımırdiń til bilýge degen qyzyǵýshylyǵy bala kezinen qalyptasqan. Ol túrki áleminiń tilderin meńgerýdi maqsat tutqan. Aıta ketsek, Vladımır túrki tilderiniń ishindegi sırek qoldanylatyn qarashaı, qaraqalpaq jáne noǵaı tilderinde de sóıleı alady.
Til bilýdiń paıdasyn ulandyq sarbaz kúndelikti qyzmet barysynda sezinedi. Ol úshin patrúldik qyzmette Almaty shahary turǵyndarynyń qaýipsizdigin qamtamasyz etý de, túrli ult ókilderimen til tabysý da esh kedergi keltirmeıdi. Qazaqqa – qazaqsha, ózbekke – ózbekshe, uıǵyrǵa – uıǵyrsha jaýap berip turǵan Vladımırdi kórgende, qarýlastary da tańdaı qaǵady.
Tek til bilimimen ǵana emes, ónerimen de erekshelenetin Vladımır rotadaǵy eń belsendi, áskerı qyzmettiń úzdik sarbazdarynyń biri. Qarýlastary shashyn qıdyrǵysy kelse, Vladımırge barady, sebebi ol naǵyz sheber shashtaraz. Odan bólek, áskerı bólimniń mobılografy. Kúndelikti qyzmetti, jaýyngerlik ómirdiń qyzyqty sátterin beınege túsirip, áskerı bólimniń áleýmettik jelidegi ımıjin qalyptastyryp júr.