Almaty oblysynda úsh saǵatta 40 myńǵa jýyq adam ákimge laıyq tulǵalarǵa daýys berip úlgerdi. Saılaý komısıalarynyń usynǵan derekterine sáıkes, saılaýshylardyń jalpy sanynyń 17 paıyzy, ıaǵnı 38 myń 783 adam daýys bergen.
Qalamyzdyń mańynda ornalasqan Qarasaı aýdanyna qarasty Eltaı aýyldyq okrýginiń ákimi qyzmetine alǵashynda bes úmitker túsken. Olardyń bireýi Nur Otan partıasynan, bireýi Qazaqstan halyq partıasynan bolsa, úsheýi ózin-ózi usynǵandar qatarynan. Alaıda QHP-nyń ókili men ózin usynǵan bir úmitker talaptarǵa saı bolmaǵandyqtan, dodadan shyǵyp qalyp, úsh adam halyq tańdaýyna tústi.
Osylaısha, Nur Otan partıasynyń ókili Birjan Mahatov, Raıymbek aýyldyq okrýgi ákimdiginiń qyzmetkeri Elaman Ómirbaev pen aýdandyq turǵyn-úı komýnaldyq sharýashylyǵynyń basshysy Eskendir Egeýbek aýyldyq okrýgtiń ákimi oryntaǵynan úmitkerler bolyp tirkeldi.
Eltaı aýyldyq okrýginde qurylǵan 6 saılaý ýchaskesi tańǵy saǵat 6-da óz jumysyn bastap, 7-de alǵashqy saılaýshylardy qabyldaı bastady. Alǵashqy bir saǵattyń ishinde 610 adam, ıaǵnı, saılaýshylardyń 5,61 paıyzy óz tańdaýlaryn jasap úlgerdi. Jalpy, atalǵan okrýgte 1872 saılaýshy bar.
«Qazaqstan halqynyń 40 paıyzynyń aýyldarda turatynyn eskersek, bul óte durys qadam. Bul, shyn máninde, aýyl turǵyndarynyń múddesi úshin jasalyp otyr. Biz Memleket basshysynyń aýyl ákimderin saılaý týraly bastamasyn shyn júregimizben qoldap otyrmyz. Bul oqıǵa elimizdiń tarıhyndaǵy aıtýly beles», – dedi aýyl turǵyny Temirǵalıev Janbolat.