Aýyldyq okrýg ákimderin saılaý kezinde Almaty oblysynyń turǵyndary belsendilik tanytýda. Bul týraly «Jetisy media» aqparattyq alańynda ótken bırıfıngte aıtyldy. Jıynǵa oblystyq aýmaqtyq saılaý komısıasynyń múshesi Qaharman Jaqsylyq, oblys boıynsha sanıtarlyq-epıdemıologıalyq baqylaý departamentiniń baspasóz hatshysy Álıa Shaǵıahmet jáne oblystyq polısıa departamenti jergilikti polısıa qyzmeti basqarmasy bastyǵynyń orynbasary Qaısar Mýhmetov qatysty.
– Tirkelgen 235 úmitkerge aýyl saılaýshylary daýys berýde. Ortasha básekelestik bir orynǵa 3,3 paıyz bolyp otyr. Oblys turǵyndary daýys berý belsendiligi boıynsha joǵary kórsetkishke qol jetkizýde. Qazirgi tańda saılaý komısıalarynyń usynǵan derekterine sáıkes, 38 783 adam daýys berdi, – dedi. Al Álıa Ǵalymjanqyzy bolsa, epıdemıologıalyq jaǵdaıdy baıandap, búgingi kúnnen bastap Almaty oblysy "sary" aımaqqa engenin habarlady.
– Sanıtarlyq talaptar árbir saılaý ýchaskelerinde saqtalǵan. Termometrdiń kómegimen kelýshilerdiń dene qyzýyn ólsheý úshin arnaıy jaýapty qyzmetkerler bekitilgen. 1-1,5 metr araqashyqtyqty saqtaý arqyly saılaýshylardyń qozǵalysyn baǵyttaıtyn jol kórsetkishteri bar. Ǵımaratta qoldy dezınfeksıalaýǵa arnalǵan qural mindetti túrde turýy, betperde rejımin saqtaý jáne ony 3 saǵat saıyn aýystyrý kerek. Ǵımaratqa kirgende qoldy dezınfeksıalaý, qol alysýdy jáne tikeleı baılanystyń basqa da túrlerin boldyrmaý qajet, – degen ol sanıtarlyq talaptar buzylǵan jaǵdaıda QR Ákimshilik quqyq buzýshylyq týraly kodeksiniń 425-baby boıynsha jaýapqa tartylyp, 83 myń teńge kóleminde aıyppul salynatynyn eskertti.
Baspasóz máslıhaty barysynda Qaısar Jaqsylyqbekuly tártip saqshylary azamattardyń bostandyǵyn jáne quqyqtaryn qorǵaý, qoǵamdyq tártipti jáne qaýipsizdikti qamtamasyz etý boıynsha jumys júrgizip jatqanyn aıtty. Polıseıler saılaý búlletenderin saılaý ýchaskelerine jetkizip, qazirgi ýaqytta ýchaske mańaıynda qoǵamdyq tártipti jáne jol qaýipsizdigin qamtamasyz etý sharalaryn uıymdastyryp jatqanyn habarlady.