«Partıalyq emes baıqaý ortalyǵy» respýblıkalyq qoǵamdyq birlestiginiń jergilikti ókilderi ákimder saılaýynda zań buzýshylyq tirkelmegenin aıtty, dep habarlaıdy almaty-akshamy.kz QazAqparatqa silteme jasap.
«Búgin aýyl ákimderiniń saılaýy ótip jatyr. Barlyq aýylda emes, tek ákimderdiń ókilettigi aıaqtalǵan aýyldarda ǵana. Al biz baıqaýshylardyń jumysyn uıymdastyrdyq. Baıqaýshylardyń kópshiligin jergilikti turǵyndar arasynan tarttyq. Olar búgin baıqaýshy bolǵanymen, erteń sol aýylda qarapaıym turǵyn retinde ómir súredi. Sondyqtan saılaýdyń burmalaýsyz ótýine múddeli», - dep jazdy "Partıalyq emes baıqaý ortalyǵy" SHQO fılıalynyń tóraǵasy Aıaýjan Áshimova İnstagram paraqshasynda.
Osy ortalyq atynan №726 saılaý ýchaskesindegi jaǵdaıdy baqylaǵan Anarhan Qabletova halyqtyń belsendi atsalysyp jatqanyn aıtady.
«Daýys berý jalǵasyp jatyr. Adamdar belsendilik tanytyp, óz tańdaýlaryn jasaýda. Eshqandaı quqyq buzýshylyq oryn alǵan joq», - deıdi "Partıalyq emes baıqaý ortalyǵynyń" ókili.
Aqmola oblysynyń Shortandy aýdanynda 9 eldi mekenniń ákimi búgingi saılaý nátıjesinde belgili bolady.
«Shortandy aýdanynda búgin tórt aýyldyq okrýg – onyń ishinde toǵyz eldi mekenniń ákimderi tikeleı saılaý arqyly anyqtalady. Aýdandyq aýmaqtyq saılaý komısıasynyń málimetinshe, aýdandaǵy 4 saılaý okrýginde 14 kandıdat tirkelgen. Onyń ishinde 4 úmitker Nur Otan partıasynyń atynan tússe, 10 úmitker ózin-ózi usynǵan. Daýys berý Novokýbanka, Andreevka, Prıgorodnyı jáne Bozaıǵyr aýyldyq okrýgterinde ótýde», - deıdi Shortandydaǵy beıtarap baıqaýshylar.
"Partıalyq emes baıqaý ortalyǵynyń" Shyǵys Qazaqstan oblysy Katonqaraǵaı aýdanyndaǵy Órel aýyldyq okrýgi boıynsha baıqaýshysy Aqbota Shákirtova daýys berý áli jalǵasyp jatqanyn, eń bastysy, barlyq sanıtarlyq talaptardyń saqtalǵanyn aıtady.
«Saılaýda daýys berý – ár adamnyń quqyǵy. El keleshegine beıjaı qaramaıtyn azamat tańdaý jasaıdy. Bul saılaý basqa saılaýlarǵa qaraǵanda ózgerek. Halyq aýyldyń ákimin ózi saılaıdy. Eger úmitkerlerdiń qaı-qaısysyna da kóńili tolmasa, «Bárine qarsymyn» degen baǵanǵa belgi qoıýǵa múmkindigi bar. Aýyl turǵyndary ózderi tanıtyn úmitkerge daýys berip jatyr», - dep jazdy Madıar Seısekeev esimdi baqylaýshy.
Kókshetaý qalasy ardagerler keńesiniń tóraǵasy Shıap Álıev te saılaýshylardyń arasynda bolyp, halyqpen sóılesip qaıtqanyn aıtady.
«Halyqtyń belsendiligi ótken saılaýlarǵa qaraǵanda edáýir artty. Saılaý kúni aýyl turǵyndarynyń saıası ómirge belsendiligi, olardyń eń aldymen ózderiniń eldi mekenderiniń bolashaǵyna jaýapkershilikpen qarap, aıqyn tańdaý jasaıtynyn múltiksiz ańǵarýǵa bolady. Óziniń 30 jyldyq tarıhynda Táýelsiz Qazaqstan Respýblıkasy áleýmettik-ekonomıkalyq jaǵynan báıgege keıin qosylsa da, qanatty júırik tulpardaı biraz elderdi qýyp jetip, tipti keıbireýlerinen ozyq turatyn jaǵdaıǵa jetti. Osynyń bir aıǵaǵy retinde joǵary deńgeıde uıymdastyrylǵan búgingi ótip jatqan saıası naýqan – aýyldar men aýyldyq okrýgter ákimderiniń tikeleı saılaýy», - degen qoǵam qaıratkeri 2021 jyldyń 25 shildesi tarıhta orny erekshe kún bolyp qalatynyn aıtty.
«Óıtkeni bul kún – aýyl turǵyndary óz eldi mekeniniń keleshegine, adamı qasıetpen bolashaqqa úlgi kórsetip, qalaýlysyn dep taýyp, daýys bergen kún. Barlyq saılanatyn úmitkerlerge sáttilik, egemendi elimizdi damytý jolyndaǵy ıgilikti, aýqymdy isterine sáttilikter tileımin», - deıdi ardagerler keńesiniń basshysy.
Al Aqmola oblysy saılaý komısıasynyń tóraǵasy Manarbek Sádýovtiń aıtýynsha, óńirde saılaýshylardyń jalpy sany - 100 111 adam. Onyń ishinde búleten alǵandardyń úlesi - 8 826.
Almaty oblysynyń «Azamattyq Alánsy» qaýymdastyǵynyń atynan №551 saılaý ýchaskesinde baıqaýshy bolyp qatysyp jatqan Juldyz Temirbekova daýys berý prosesi barlyq talaptarǵa saı ótip jatqanyn aıtqan.
«Saılaý ýchaskesiniń jumysy qalypty júrip jatyr. Daýys berý prosesi barlyq talaptarǵa saı júrgizilýin qadaǵalaımyn jáne sizdermen saılaý ýchaskesindegi jańalyqtarmen bólisip otyramyn», - deıdi baıqaýshy.