Otandyq bıznes ókilderi ózara bas qosyp, eldiń ekonomıkalyq áleýetin arttyrýdyń jańa joldaryn qarastyrýdy qolǵa aldy. Sondaı-aq, olar «Qazaqstanda Jasalğan» qozǵalysy qurylǵanyn atap ótti.
Kásipkerlerdiń aıtýynsha, búginde qarapaıym halyq, memlekettik organdar, iri korporasıalar, jergilikti atqarýshy organdar qazaqstandyq óndirýshiler men otandyq servıstik kompanıalar usynatyn taýarlar men qyzmetterdi óte az mólsherde tutynyp kele jatqan jaıy bar. Bul otandyq ónimniń órkendeýine keri áserin tıgizýde. Qozǵalys músheleriniń aqparatyna sensek, mashına jasaýdyń 92 paıyzy, jeńil ónerkásiptiń 96 paıyzy, kıimder men jeıdelerdiń 100 paıyzy, aıaq kıimniń 99 paıyzy ımporttalady eken.
«Bizdiń kásipkerlerimizdiń qolynan bári keledi. Árqaısysy óz salasynyń bilikti mamanyna aınaldy. Taýardy sapaly ári tıimdi shyǵarýǵa bar kúshin salýda. Degenmen, keıde bizge de qoldaý aýadaı qajet bolatyn kezder bolady. Ondaı sátterde bir-birimizge aqyl-keńes, qoldaý bildiretin qoǵamdyq uıymnyń qajettiligin sezinemiz. Qazirgi tańda elimizdiń ár aımaǵynan otandyq kásipkerler óz ótinishterin bildirýde. Búginde kásipkerlerimiz eldi mekenderde túrli jumys oryndaryn ashyp, eldiń ekonomıkasyn jaqsartyp kele jatqan jaıy bar. Kásipkerlerdiń kózinde ot bar. Otandyq bıznesti qoldaý arqyly biz Qazaqstannyń áleýetin kóteretinimizdi umytpaýymyz kerek. Táýeldilikten arylyp, kerek taýardy ózimiz óndirsek, tamasha bolar edi. Importty azaıta otyryp, ishki ónimdi kóbeıte berý kerek. Kóbeıtý úshin kásipkerlerdi qoldaý kerek», – dedi QR Jıhaz jáne aǵash óńdeý ónerkásibi qaýymdastyǵynyń prezıdenti Qanat Ibraev.
Osy rette Prezıdent Qasym-Jomart Toqaevtyń 2022 jyldyń 14 shildedegi Úkimettiń keńeıtilgen otyrysynda «Qazaqstanda jasalǵan» (Made in KZ) jalpyulttyq jobasyn iske qosý boıynsha usynystar engizýdi tapsyrǵan kezde biraz jumys qolǵa alyna bastaǵan.
«Atqarýshy bılik jergilikti kásipti qoldaı almaı keledi. Eger shetelden ınvestor kelse, ony bir kúnde úsh mınıstr qabyldap, qajetti qujattaryna qol qoıyp beredi. Al qazaq kásipker kelse, «qazaqtar jalqaý», «qazaqtardyń qolynan túk kelmeıdi» degen prınsıppen qaraıdy. Biraq biz qazaqtyń jalqaý emes ekenin dáleldegimiz keledi, ony biz dáleldep te júrmiz. Bir sózben aıtsaq, qazaq qazaqqa senbeıdi», – deıdi Qorǵanys-ónerkásip kesheni kásiporyndary qaýymdastyǵynyń tóraǵasy Aıbek Barysov.
Otandyq kásip ıeleri naqty talap-tilegin pysyqtap, tıisti orynǵa hat joldaıtynyn jetkizdi. Olardyń aıtýynsha, eldegi ekonomıkanyń ósýine barsha qazaqstandyq atsalyp, qoldaý bildirýi qajet.