QR Úkimetiniń otyrysynda tótenshe jaǵdaılar vıse-mınıstri Baýyrjan Syzdyqov óńirlerdegi aǵymdaǵy sý tasqyny jaǵdaıy jáne eldi mekenderdi sý tasqynynan qorǵaý sharalary týraly aıtty.
Baýyrjan Syzdyqov atap ótkendeı, qazirgi ýaqytta Atyraý, Batys Qazaqstan jáne Soltústik Qazaqstan oblystarynda sý tasqynyn joıý jalǵasýda. Elimizdiń batysynda Irıklın sý qoımasynan (Reseı) Jaıyq ózenine sý quıýylýyna baılanysty jaǵdaı kúrdelene tústi. Respýblıkanyń soltústiginde sý Aqmola oblysynan keledi.
Abaı, Ulytaý, Pavlodar, Qaraǵandy, Aqmola jáne Qostanaı oblystarynda jaǵdaı turaqty, jergilikti ózenderdegi sý deńgeıi birtindep tómendep keledi. Eldi mekenderdi sý basý qaýpi joq.
Mınıstrdiń málimetinshe, búginde 5 myńnan astam turǵyn úı, 18 myńnan astam saıajaı men 1 myń aýla aýmaǵy, sondaı-aq 91 ǵımarat sý astynda qalyp otyr.
«Sý tasqynynyń saldary aýqymdy boldy, eldi mekenderge zıan keltirdi. 10 oblysta 41 jergilikti aýqymdaǵy tótenshe jaǵdaı jarıalandy. Qazir Abaı men Pavlodar oblysynyń 3 aýdanynda TJ rejımi alynyp tastaldy», - dedi Shyńǵys Árinov.
Onyń aıtýynsha, TJ aımaqtaryndaǵy eldi mekenderdiń tirshiligin qamtamasyz etý máseleleri jedel sheshilýde. Bul aýyz sýdy jetkizýge, energıamen jabdyqtaýdy qalpyna keltirýge jáne kólik baılanysyna qatysty.
Vıse-mınıstr sý tasqynyn joıý bastalǵannan beri shamamen 11,6 mln tekshe metr erigen qar sýy sorylǵanyn, 5 mln astam birlik qaptar salynǵanyn habarlady.
«Qutqarý jáne shuǵyl jumystar kezinde jańa ádister men tásilder alǵash ret engizildi. Mysaly, Aqtóbe jáne Soltústik Qazaqstan oblystarynda ponton kópirlerin ornatý, qysqa merzimde sý burý arnalaryn salý. Bul kólik qatynasyn qamtamasyz etýge jáne sý basý qaýpin azaıtýǵa múmkindik berdi», — dep atap ótti.
Sý basý aımaqtarynan barlyǵy 119 myńǵa jýyq adam aldyn ala evakýasıalandy, onyń ishinde 44 myńnan astamy bala. Zardap shekkenderdi evakýasıalaý jáne ornalastyrý boıynsha barlyq máseleler sol jerde jedel sheshiledi, azamattar eshnárseden muqtajdyq kórmeıdi. Qajet bolǵan jaǵdaıda olarǵa medısınalyq jáne psıhologıalyq kómek kórsetildi.
«Qutqarýshylar bosanǵan áıelderdi de qutqarýǵa májbúr bolǵan jaǵdaılar boldy, olardyń barlyǵy aýrýhanalarǵa aman-esen jetkizildi. Ieleri tastap ketken janýarlardy da qıyn jaǵdaıda qaldyrmady», — dep atap ótti vıse-mınıstr.
Ol qutqarýshylar men tartylǵan barlyq qyzmetkerler táýlik boıy ári óte qıyn jaǵdaıda jumys istep jatqanyn aıtty. Búgingi tańda tótenshe jaǵdaıdy joıýǵa 32 myńnan astam adam, 5 myńǵa jýyq tehnıka, 310 júzý quraldary men 13 tikushaq jumyldyrylǵan.
Apattyq jáne shuǵyl jumystardy úzdiksiz júrgizý úshin 10 óńirde kóptegen arnaıy jáne basqa da tehnıkalar jedel túrde paıdalanýǵa shyǵaryldy.
«Qazirgi ýaqytta Memleket basshysynyń tapsyrmasy boıynsha ákimdikter zardap shekkenderge materıaldyq shyǵyndy eseptep, tólep jatyr. Biz sý qoımalaryn táýlik boıy baqylaýdy jalǵastyramyz, azamattardyń qaýipsizdigin qamtamasyz etý jáne sý basý qaýpin azaıtý úshin barlyq qajetti sharalardy qabyldap jatyrmyz», — dep qorytyndylady sózin Baýyrjan Syzdyqov.