Almatyda jastardyń erik-jigerin oıatatyn «LAULA» fılminiń premerasy ótti.
Týyndyda 22 jastaǵy arýdyń shym-shytyryqqa toly kezeńi baıandalǵan. Shaǵyn ǵana qaladan shyqqan qyzdyń alyp shahar Almatyǵa kelip, qalaı mıllıoner atanǵany sýretteledi, dep habarlaıdy Almaty-akshamy.kz.
«LAULA» fılmniń senraııi nebári 10 kúnde jazylyp, týyndynyń túsirilimi bar-joǵy 12 kúnde aıaqtalǵan. Basty róldi somdaǵan bloger Laýra Lesbekke bul ıdeıa Balıde saıahattap júrgende kelipti. Ol óziniń ómirin boıamasyz kórsetýdi kózdegen. Fılm sújetinde qarjylyq qysyltaıań kezde sheshim qabyldap, áreket etken adamnyń jetistikke jetetine sendirýge tyrysady.
«Bul fılm árbir qazaq qyzyn, árbir qazaq jasyn laýlatatyn fılm, sebebi bul motıvasıalyq fılm, bul árbir jastyń óziniń qalaǵan qalaýyna, armanyna qolynyń jete alatynyna kórsetetin fılm jáne de bul fılm arqyly óziniń qazir oty sónip júrgen jandar, múmkin UBT-dan qulaǵan jandar, óziniń ómirlik jolyn tappaı júrgen jandar, óziniń ómirlik jolyn tabýyna septigin tıgizedi degen oıdamyn», - deıdi «LAULA» fılminiń prodúseri Laýra Lesbek.
Kıno Almaty jáne Leńgir qalalarynda túsirilgen. Al túsirilim komandasynyń negizgi músheleri 22 adam. Shyǵarmashylyq top fılmdi jastardyń ata-analarymen birge kórýine keńes beredi. Óıtkeni, balaǵa áke-sheshesiniń qoldaýy qanshalyqty mańyzdy ekeni baıandalady.
«LAULA» fılmin kórgen kezde motıvasıa alýǵa bolady, Laýranyń basynan ótken oqıǵasy, óziniń qınalǵan sátterinen bastap, qalaı ol qıyndyqtardy jeńý kerek, qalaı óz-ózińmen jumys jasaý kerek sonyń barlyǵy kórsetiledi, men ol kınoda Laýranyń jigiti bolyp oınaımyn, basynda oılaǵan joqpyn bul osyndaı áserli kıno bolady dep, ózim kórgen kezde kádimgideı oılandym», - deıdi akter Dinmuhamed Joldas.
Órimdeı qyzdyń ózgege shabyt beritin fılmin elimizdiń barlyq «Kınopark» jáne «Kınopleks» kınoteatrlarynan kórýge bolady.