Alataý aýdany – qaladaǵy eń jyldam damyp kele jatqan aýdannyń biri. Qazir munda qurylys qarqyny eselep ósken. Ásirese salynyp jatqan mekteptiń kóptigi birden kózge túsedi. Óńirlik komýnıkasıalar ortalyǵynda Alataý aýdanynyń ákimi Talǵat Malybaev osylaı dedi, dep habarlaıdy aqshamnews.kz
Qazir aýdandaǵy 31 memlekettik, 12 jeke menshik mektepte 61 095 oqýshy bilim alyp jatyr. Olardyń 57 814-i memlekettik mektepke, 3 281-i jeke menshik mektepke barypty. Degenmen, turǵyndardyń sany óskendikten mektepke suranys artyp, bıyl shamamen 6 myń oryn jetińkiremeı turǵanyn aıtady. Alataý aýdany «Jaıly mektep» ulttyq jobasynyń aıasynda osy máseleni sheship, endi 13 250 oqýshyǵa arnalǵan segiz mektep salmaq.
Samǵaý, Terekti, Qarasý aýdandarynda eki myń oryndyq úsh mektep salynyp bitti. Aqbulaq yqshamaýdanynda 1500 oryndyq taǵy bir mektep bitýge shaq tur. Aldaǵy qyrkúıekte Aıgerim yqshamaýdanynda eki myń oryndyq jańa bilim ordasy paıdalanýǵa berilmek. Alǵabas pen Ǵajaıyp yqshamaýdanynda da eki mekteptiń qurylysy bastalǵan, olardy 2026 jyly qoldanysqa bermek bolyp otyr. Budan bólek, Zerdeli yqshamaýdanynda da 2026 jyly ashylatyn 550 oryndyq eki mektep taǵy salynyp jatyr.
Bilim beretin mekemelerden bólek, kásibı jáne qosymsha bilim berýge de kóńil bólip otyr ákimdik. Máselen, Alǵabas aýdanynda 720 oryndyq Inovasıalyq tehnıkalyq kolej salyna bastady. 7,4 mlrd teńge ketetin bul jańa nysanǵa 2026 jyldyń qańtar aıynda kire bastamaq. Saıaly yqshamaýdanynda Inovasıalyq shyǵarmashylyq ortalyq irge kóteredi. Bul nysan keler jyly qoldanysqa berilip, balalar men jasóspirimderdi qosymsha oqytatyn úlken ortalyqqa aınalady,- dedi Talǵat Malybaev.
Osylaısha, Alataý aýdany balalardyń jaǵdaıyn jasap, olarǵa sapaly tehnıkalyq bilim berýi baǵytynda ónimdi jumys istep jatyr.