Baǵdarlama aıasynda bilim berý jáne densaýlyq saqtaý mekemelerinde qol jýýǵa arnalǵan oryndar sanıtarlyq-gıgıenalyq jabdyqtarmen tolyq qamtamasyz etiledi.
2025 jyly Ózbekstanda halyqtyń sanıtarlyq jaǵdaıyn jaqsartýǵa baǵyttalǵan aýqymdy sharalar qolǵa alynyp otyr. Prezıdent Shavkat Mırzıeevtiń bastamasymen elde «Taza qol» atty arnaıy baǵdarlama júzege asyrylady, dep habarlaıdy aqshamnews.kz
upl.uz-tiń málimetinshe, bul jobaǵa 780 mıllıard sým (shamamen 64 mıllıon dollar) kóleminde qarjy bólinedi.
Baǵdarlama aıasynda bilim berý jáne densaýlyq saqtaý mekemelerinde qol jýýǵa arnalǵan oryndar sanıtarlyq-gıgıenalyq jabdyqtarmen tolyq qamtamasyz etiledi. Sondaı-aq sanıtarlyq ınfraqurylymdy jańǵyrtýǵa basymdyq berilmek.
Atap aıtqanda, 126 mektepte oqýshylarǵa qolaıly jaǵdaı jasaý úshin ishki dárethanalar salynady. 6 myńǵa jýyq balabaqshaǵa kún energıasynan qýat alatyn kolektorlar ornatylady. Al 4300 áleýmettik nysanǵa úzdiksiz aýyzsý jetkizý maqsatynda sý saqtaıtyn rezervýarlar qoıylady.
«Taza qol» baǵdarlamasynyń taǵy bir mańyzdy baǵyty — turǵyndardyń jeke gıgıena talaptaryn saqtaý mańyzdylyǵy jóninde aqparattandyrý jumystary. Dáriger mamandardyń aıtýynsha, qarapaıym gıgıenalyq erejelerdi saqtaý arqyly juqpaly aýrýlardyń 35–40 paıyzyn aldyn alýǵa bolady.
Bul bastama Ózbekstanda qoǵamdyq densaýlyqty nyǵaıtýǵa jáne óskeleń urpaqqa tazalyq mádenıetin úıretýge baǵyttalǵan mańyzdy qadam bolmaq.