Almatyda otandyq taýar óndirýshilerdiń jyl saıynǵy «Ulttyq Ónim» kórmesi bastaldy. İs-sharaǵa 300-den astam otandyq, onyń ishinde 30 almatylyq kompanıa qatysady, olar tamaq, qurylys, jıhaz, toqyma ónerkásibi, kádesyı jáne t.b. ónimderdi óndiredi, - dep habarlaıdy almaty-akshamy.kz
Kórmeniń ashylýynda Erbolat Dosaev atap ótkendeı, mundaı aýqymdy is-sharany ótkizý Almatynyń óńirdegi jáne eldegi iskerlik tartymdylyq ortalyǵy retindegi mártebesin kórsetedi. Jıyn kásipkerlerge jańa seriktester men ótkizý naryǵyn tabýǵa jol ashyp, ónimin kórsetýge múmkindik beredi, al iskerlik baǵdarlama óńiraralyq yntymaqtastyqty odan ári nyǵaıtýǵa jáne kásiporyndar arasynda kooperasıalyq baılanystar qurýǵa baǵyttalǵan ózekti taqyryptardy talqylaýǵa arnalǵan platforma bolady.
«Bıyl jyl basynan beri megapolıste iskerlik belsendilik aıtarlyqtaı ósti. Osy jyldyń birinshi toqsanynda iskerlik belsendilik ındeksiniń deńgeıi boıynsha (57,9%) Almaty Qazaqstan óńirler arasynda birinshi orynǵa shyqty. Qysqa merzimdi ekonomıkalyq kórsetkish shamamen 24%-ǵa ósti. SHOB damytý árkez bizdiń nazarymyzda. Bıyl memlekettik jáne qalalyq baǵdarlamalar aıasynda ekonomıkanyń basym baǵyttary men salasyndaǵy 3 myńnan astam jobany qoldaý úshin 44 mlrd.teńge bólindi», - dedi Almaty ákimi Erbolat Dosaev.
Almaty – bıznes jáne kapıtal ortalyǵy. 2022 jyldyń qorytyndysy boıynsha Almatynyń JÓÓ 5,1%-ǵa ósti. Kásipkerlik bastamanyń arqasynda búginde qala ekonomıkanyń besten bir bóligin (2022 jyly 18,5%) jáne respýblıkalyq búdjet kirisiniń tórtten birin qamtamasyz etedi.
«Ulttyq Ónim» qazaqstandyq taýarlar kórmesin Almaty qalasy ákimdiginiń qoldaýymen «Damý» kásipkerlikti damytý qory uıymdastyrdy. 5-7 mamyr aralyǵynda is-shara aıasynda qazaqstandyq dızaınerlerdiń sán kórsetilimi ótip, konserttik baǵdarlama, kórmege kelýshilerdiń arasynda utys oıyny oınatylady.