«Almaty-Astana», «Astana-Almaty» jáne «Almaty-Semeı» reısterinde qyzmet atqarǵan 4 bort serik ózderin jaısyz sezingen.
Resmı málimetterge súıensek, úsheýi aýrýhanaǵa túsken, al bireýi úıinde emdelýdi jón sanaǵan, dep habarlaıdy Almaty-akshamy.kz.
Qazir olardyń jaǵdaıy jaqsy. Osy jaıtqa qatysty tamaqpen qamtamasyz etetin mekemeniń sehynda tekseris júrgizilgen. Sanıtarlyq normalardyń buzylǵany anyqtalyp, 1600 AEK kóleminde aıyppul salyndy. Degenmen, sanıtarıalyq-epıdemıologıalyq departament ókilderi ekıpaj músheleriniń naqty borttaǵy tamaqtan ýlanǵanyna kúmán keltirip otyr.
«Barlyq qajetti taldaýlar júrgizildi. Taldaýlar nátıjesi boıynsha teris nátıje alyndy. Olar qoldanǵan tamaq ónimderiniń barlyǵynan eshqandaı oń nátıje shyqqan joq. Osyǵan baılanysty borttyq tamaqtan ýlanýdy osy atalǵan tamaqtandyrýmen baılanysty emes degen tujyrym shyǵardyq», -dedi DSM Kóliktegi sanıtarıalyq-epıdemıologıalyq baqylaý departamenti basshysynyń mindetin atqarýshy Aqmaral Ramazanqyzy.