Búgin Almatynyń №29 Qalalyq emhanasynda aýdıologıalyq skrınıng kabıneti ashyldy, bul balalarda estý qabiletiniń buzylýyn erte anyqtaýǵa baǵyttalǵan biregeı joba, dep habarlaıdy aqshamnews.kz
Mundaı mańyzdy is-shara 2025-2026 jyldarǵa arnalǵan «Men estımin» pılottyq baǵdarlamasynyń bir bóligi boldy. Baǵdarlama Almaty qalasy Qoǵamdyq densaýlyq saqtaý basqarmasynyń qoldaýymen, sondaı-aq SATR Ortalyǵy, «Pas Medıkal» kompanıasy jáne «Mıloserdıe» erikti qoǵamy» qoǵamdyq qorynyń qatysýymen júzege asyryldy.
«Aýdıologıalyq skrınıngtik kabınet balalardyń estý qabiletin erte kezeńde dıagnostıkalaýǵa baǵyttalǵan, bul - ýaqytynda emdeý men nátıjeli ońaltý úshin óte mańyzdy. №29 emhanada kabınet ashylǵanǵa deıin, mundaı tekserýler №5 Qalalyq klınıkalyq aýrýhanada kelisim-shart boıynsha júrgizilgen, endi dıagnostıka Alataý aýdanynyń turǵyndaryna óz úıleriniń janynda qoljetimdi boldy», - deıdi Ana men bala densaýlyǵy bóliminiń meńgerýshisi Jadyra Ahmetova.
Esterińizge sala keteıik, Qazaqstanda estý dıagnostıkasy eki kezeńde uıymdastyrylǵan:
1. Bastapqy deńgeı – jańa týǵan nárestelerdiń estý qabiletin ólsheý perzenthanalarda júrgiziledi.
2. Ekinshi deńgeı – emhanalarda 1 jasqa deıingi jáne 1-den 3 jasqa deıingi balalarda estý qabiletinen aırylý jáne sańyraýlyq qaýpiniń faktorlaryn anyqtaý úshin dárigerler anamnez jınaı otyryp, ambýlatorıalyq tekserýler júrgizedi. Qajet bolǵan jaǵdaıda balalar qalalyq aýdıologıa ortalyǵyna tereńdetip tekserýge jiberiledi.
«Osy joba aıasynda jaqyn arada jáne 4 medısınalyq mekemeni jańa jabdyqtarmen jabdyqtaý josparlanýda: №3 perınataldyq ortalyq, №5 perzenthana, №10 jáne №36 Qalalyq emhanalar», - dep atap ótti J.Ahmetova.
Aýdıologıalyq skrınıngtik kabınetterdiń ashylýy balalarǵa arnalǵan medısınalyq qyzmetterdiń qoljetimdiligin arttyratyny sózsiz, estý problemalaryn ýaqtyly anyqtaýdy jáne balalar densaýlyǵy úshin aýyr zardaptardyń aldyn alýǵa múmkindik beredi.
Dúnıejúzilik densaýlyq saqtaý uıymynyń derekteri boıynsha 2050 jylǵa qaraı 2,5 mlrd. jýyq adam estý qabiletinen aırylýdan zardap shegedi, onyń 700 mln. adamy ońaltýdy qajet etedi. Alaıda bul jaǵdaılardyń kóbin ýaqtyly dıagnostıkalaý jáne emdeý arqyly aldyn alýǵa bolady.