Kúdikti ustalyp, ýaqytsha ustaý ızolátoryna qamaýǵa alyndy, dep habarlaıdy aqshamnews.kz Polisia.kz-ke silteme jasap.
"Zań jáne tártip" qaǵıdaty aıasynda Jetisý oblysynyń PD esirtki qylmysyna qarsy is-qımyl basqarmasy qyzmetkerleri oblystyq prokýratýramen birlese otyryp, "Qarasora" jedel-profılaktıkalyq is-sharasy barysynda taksımen iri kólemde esirtki zatyn tasymaldamaq bolǵan 28 jastaǵy almatylyqty ustady.
Jedel-izdestirý is-sharalary Almaty – Óskemen avtojoly boıymen Almaty qalasy – Taldyqorǵan baǵyty boıynsha baqylanatyn jetkizý ádisimen júrgizildi. Taksı júrgizýshisiniń basqarýyndaǵy Lexus 350 avtokóligin tekserý kezinde júksalǵyshtan aq qap tabyldy. Onyń ishinde skochpen oralǵan qara tústi polıetılen qapshyqtyń ishinde jasyl tústi untaq tárizdi ósimdik tektes zat bolǵan. Alynǵan zat jalpy salmaǵy 5 keli 952 gram bolatyn gashısh esirtki quraly bolyp shyqty. Kúdikti ustalyp, ýaqytsha ustaý ızolátoryna qamaýǵa alyndy. Qazirgi ýaqytta tergeý amaldary júrgizilýde.