Qalada 128 sýburqaq bar.
Almatyda sýburqaqtar 25 mamyrǵa deıin kezeń-kezeńimen, tekseristen ótken soń iske qosylady, dep habarlady Almaty-akshamy.kz QazAqparatqa silteme jasap.
«Búginde Almaty qalasynda 128 sýburqaq bar, onyń 63-i komýnaldyq menshikte, 65-i jeke menshikte. «Eco Almaty» JSHS 63 komýnaldyq sýburqaqqa qyzmet kórsetedi. Onyń 60-yn kestege sáıkes bıyl 25 mamyrǵa deıin qosý josparlandy. Úsheýi qaıta jańartylýda (Áýezov atyndaǵy «Qazdramteatr» alańy, «QR Memlekettik mýzeı alańy», QBTÝ (soltústik jaǵy).
Sońǵy bes jylda Almatyda jańa 13 sýburqaq salynyp, 10-y qaıta jańartýdan ótti («Nedelka», Abaı atyndaǵy opera jáne balet teatry alańynda, «Tórt tostaǵan», PK Tuńǵysh Prezıdenti saıabaǵyndaǵy bas sýburqaq, Qasteev atyndaǵy memlekettik mýzeı alańynda, Respýblıka saraıy alańynda (soltústik jaǵy), Qurmanǵazy – Qarmysov kósheleri qıylysynda, Respýblıka saraıynyń qasbetinde, Lermontov atyndaǵy teatr alańy, Ulttyq kitaphana ǵımaraty alańynda)», - delinedi ákimdiktiń jaýabynda.
Sondaı-aq, qazirgi ýaqytta sýburqaqtarǵa josparly qysqa merzimdi jóndeý jumystary júrgizilýde.
«Ótken ǵasyrdyń 60-80 jyldary salynǵan sýburqaqtardyń kópshiligi qatty tozǵan. Degenmen mamandar sýburqaqtardy tehnıkalyq jaramdy kúıde ustaýda. Sýburqaqtarda aǵymdaǵy jóndeý jumystary, sanıtarlyq tazalaý men jınaý ýaqtyly júrgiziledi. Árbir komýnaldyq sýburqaqta shomylýǵa tyıym salynǵan taqtaıshalar bar, sebebi, 2009-2019 jyldary kúrdeli jóndeý júrgizilgen soń, sýburqaqtardyń jobalary ózgertilgen. Iaǵnı, elektr jabdyqtary, sý astyndaǵy jaryqtandyrý jabdyqtary, sýasty sorǵylary jáne t. b. engizildi.Almaty qalasynyń komýnaldyq sýburqaqtaryn dezınfeksıalaý aıasynda sý syıymdylyǵy men sýburqaq alańyna sáıkes, natrıı gıdrohlorıdi (sýdy zararsyzdandyrý) jáne mys súlfaty (sýda bakterıalardy, baldyrlardy boldyrmaý) qosylady», - dep jaýap berdi ákimdikte.