XVII «Eýrazıa» kınofestıvali Sháken Aımanov pen «Qazaqfılm» kınostýdıasynyń mereıtoılaryna erekshe mán bermek, dep habarlaıdy aqshamnews.kz.
«Eýrazıa» – Qazaqstandaǵy eń iri kınoforým jáne halyqaralyq kınoprodúserler qaýymdastyqtary Federasıasy (FIAPF) akkredıttegen Ortalyq Azıadaǵy birden-bir kınofestıval. Festıváldiń turaqty quryltaıshysy ári uıymdastyrýshysy QR Mádenıet jáne aqparat mınıstrligi.
Kınofestıvaldi uıymdastyrý Sháken Aımanov atyndaǵy «Qazaqfılm» ulttyq kınostýdıasyna tapsyryldy. Munyń ózindik sebebi de bar. Osy jyly kınostýdıa birneshe mańyzdy mereıtoıdy atap ótýde. Birinshiden, kınostýdıanyń 90 jyldyǵy. Ekinshiden, qazaq kınosynyń maıtalmany - Sháken Aımanovtyń týǵanyna 110 jyl jáne «Qazaqfılm» kınostýdıasyna onyń esimi berilgenine 40 jyl toldy. Aldaǵy festıválde osy aıtýly datalarǵa erekshe mán berilmek.
Búginde «Eýrazıa» kınofestıvali - Ortalyq Azıa óńirindegi eń mańyzdy mádenı sharalardyń birine aınaldy. 1998 jyly festıvál qurylǵan sátten bastap «Eýrazıa» dástúrinde ósken qazaqstandyq kınematografısterdiń tutas býyny qalyptasty. Olardy «Eýrazıa urpaǵy» dep ataýǵa bolady.
Uıymdastyrýshylardyń aıtýynsha, bıyl kınofestıval aıasynda Halyqaralyq baıqaý ótedi, munda Eýropa men Azıa elderiniń tolyqmetrajdy fılmderi, sondaı-aq Ortalyq Azıa men Túrki álemi elderiniń fılmderi usynylady. «Eýrazıa» iskerlik alańy da kóptegen jańalyqtarǵa toly bolmaq. «Turan» ýnıversıteti men T.Júrgenov atyndaǵy Qazaq ulttyq óner akademıasynda túrli sheberlik sabaqtary men dóńgelek ústelder uıymdastyrylady. Kınematografıster PROKK (kınematografısterdiń kásibı klýby) aıasynda ózara tájirıbe almasady.
XVII «Eýrazıa» halyqaralyq kınofestıvaliniń saltanatty ashylý rásimi 24 qarashada qalanyń eń sándi oryndarynyń biri - Almaty Theatre ótedi.
Sondaı-aq, ár jyldary festıváldiń qurmetti qonaqtary qatarynda Katrın Denev, Kevın Kostner, Izabel Adjanı, Per Rıshar, Sofı Marso, Djeremı Aırons, Ornella Mýtı, Stıven Sıgal, Sıgýrnı Ýıver, Jerar Deparde jáne basqa da kóptegen álemdik kıno juldyzdary bolǵanyn atap ótken jón.