Densaýlyq saqtaý mınıstri eldiń sanıtarlyq-epıdemıologıalyq jaǵdaıy turaqty bolyp turǵanyn aıtty.
2021 jylǵy 22 qarashada koronavırýsqa qarsy revaksınasıa bastalady, dep habarlaıdy Almaty-akshamy.kz Úkimettiń resmı saıtyna silteme jasap.
Búgin ótken Úkimet otyrysynda eldegi sanıtarlyq-epıdemıologıalyq ahýal qaraldy.
Vırýstyń reprodýktıvti ındeksi 0,90 quraıdy. Infeksıalyq tósekter 30%, reanımasıalyq tósekter 26% toly. Koronavırýs ınfeksıasynyń taralý qarqyny boıynsha Shymkent qalasy, Aqtóbe, Atyraý, Almaty, Batys Qazaqstan, Túrkistan, Jambyl, Qyzylorda, Mańǵystaý jáne Shyǵys Qazaqstan oblystary «jasyl aımaqta», Nur-Sultan jáne Almaty qalalary, Aqmola jáne Qaraǵandy oblystary «sary aımaqta» ornalasqan. Qostanaı, Pavlodar jáne Soltústik Qazaqstan oblystary «qyzyl aımaqta» tur.
Búgingi tańda shamamen 8,5 mln adam vaksınanyń birinshi komponentin, 7,7 mln-nan astam adam ekinshi komponentin aldy. Eýropanyń birqatar elinde, sondaı-aq Qazaqstanmen shekaralas memleketterde syrqattanýshylyqtyń ósýin eskere otyryp, Úkimet basshysy sanıtarıalyq talaptar sharalarynyń jappaı saqtalýyn qamtamasyz etýdi, monıtorıńtik toptardyń talaptardyń saqtalýyn baqylaý jónindegi jumysynyń tıimdiligin kúsheıtýdi jáne buzýshylarǵa qatań sharalar qabyldaýdy tapsyrdy.
«22 qarashadan bastap buǵan deıin ekpe alǵan azamattardy revaksınasıalaý bastalady. Osyǵan baılanysty egý pýnktteriniń, medısınalyq uıymdardyń jáne medısına qyzmetkerleriniń daıyndyǵyn qamtamasyz etý qajet», — dedi Asqar Mamın.