Onyń 75 myńy turaqty jumysqa turǵan.
Qazaqstanda 210 myńnan astam jas jumyspen qamtyldy, dep habarlaıdy QR Eńbek jáne halyqty áleýmettik qorǵaý mınıstrligine silteme jasap.
Jastar «Alǵashqy jumys orny» jáne «Urpaqtar kelisimsharty» jobalary, qoǵamdyq jumystar, «Bastaý bıznes» jobasy boıynsha kásipkerlik negizderine oqytý jáne grant alý baǵdarlamalary arqyly jumysqa ornalasty. Bul jobalar mamandyǵy boıynsha tájirıbesi joq, jaqynda oqýyn aıaqtaǵan, sondaı-aq NEET sanatyna jatatyn 16-28 jas aralyǵyndaǵy jastarǵa arnalǵan.
«Jastar praktıkasyn uıymdastyrý sheńberinde sońǵy úsh jyl ishinde oqýyn aıaqtaǵan joǵary oqý oryndary men kolejderdiń túlekteri qataryndaǵy jumyssyzdarǵa qoldaý kórsetiledi. 2022 jyly jumysqa ornalasqandar sany 25,3 myń adamdy qurady, onyń 44%-y jumys berýshide turaqty negizde bekitildi», - delingen habarlamada.
Tek mektep bilimi bar nemese jaqynda mamandyǵy boıynsha oqýyn bitirgen jastarǵa «Alǵashqy jumys orny» jobasy boıynsha jumysqa ornalasýǵa múmkindigi bar. «Urpaqtar kelisimsharty» jobasy zeınetkerlik jasqa deıingi qyzmetkerlerden bastap jas mamandarǵa tájirıbe men bilim berýdi kózdeıdi. Bul shara aıasynda 3,8 myń jas jumyspen qamtylǵan.
Al 30,7 myńnan astam jas qoǵamdyq jumysqa ornalastyryldy.
Jastar arasynda kásipkerlik bastamalardy damytý maqsatynda 58 myńnan astam adam bıznes júrgizý daǵdylaryna ıe boldy, onyń 6 myńyna óz isin bastaýǵa granttar berildi.
Jumys berýshilerdiń suranysy boıynsha (oqý ornynda nemese jumys ornynda) qysqa merzimdi oqýǵa 3,3 myń adam jiberildi, olar oqý aqysy túrinde memlekettik qoldaýmen, sondaı-aq stıpendıamen jáne oqý ornyna baryp kelýge, turýǵa jáne medısınalyq tekserýden ótýge materıaldyq kómekpen qamtamasyz etildi. Onyń ishinde 1220 adam oqýdy aıaqtady, onyń 985-i jańa mamandyq boıynsha turaqty jumysqa ornalastyryldy.
5 myńnan astam jas Skills.Enbek portalynda onlaın oqytýdan ótý arqyly quzyrettilikterin arttyryp, daǵdylardy ıgerdi.