Qarýly kúshterdiń bul aýqymdy túri 1993 jyly sáýirde Orta Azıa áskerı okrýginiń 40-shy jalpyáskerı armıasynyń bazasynda quryldy.
Qurlyq áskerleri eldiń aýmaqtyq tutastyǵy men egemendigin qorǵaý úshin áskerlerdiń jaýyngerlik ázirligin qoldaýda negizgi mindet atqarady, dep habarlaıdy Almaty-akshamy.kz Qorǵanys mınıstrligine silteme jasap.
Olar qajet bolǵan kezde tehnogendik jáne tabıǵı sıpattaǵy tótenshe jaǵdaılardyń saldaryn joıý men memlekettik jáne áskerı nysandardy kúzetýge de qatysady.
Qurlyq áskerleriniń quramyna «Astana», «Shyǵys», «Batys», «Ońtústik» óńirlik qolbasshylyqtary, tyldyq jáne tehnıkalyq qamtamasyz etý quramalary men bólimderi, Qurlyq áskerleriniń áskerı ınstıtýty, Shoqan Ýálıhanov atyndaǵy Qorǵanys mınıstrliginiń áskerı koleji kiredi.
Ásker túri qarý-jaraq pen áskerı tehnıkanyń, joǵary dáldiktegi qarýlardyń, baılanys, barlaý jáne avtomattandyrylǵan basqarý júıeleriniń qazirgi zamanǵy úlgilerimen jabdyqtalǵan. Elimizdiń qorǵanys-ónerkásiptik kesheni kásiporyndarynda T-72 tankterin, áýe shabýylyna qarsy qorǵanys áskerleriniń jyljymaly basqarý pýnkterin jáne baqylaý-tekserý mashınalaryn jańǵyrtý jumystary júrgizilýde.
Qazirgi zamanǵy syn-tegeýrinder men qaýip-qaterlerdi eskere otyryp, áskerlerde birqatar baǵyttar boıynsha jaýyngerlik daıyndyq baǵdarlamalary qaıta qaraldy. Zertteý oqý-jattyǵýlary barysynda jaýyngerlik is-qımyldardy júrgizýdiń jańa ádisteri men tásilderi synaqtan ótkizilýde. Jalpy jaýyngerlik daıyndyqtyń qarqyndylyǵy birneshe ese ósti dep aıtýǵa bolady.
Qurlyq áskerleriniń jeke quramy respýblıkalyq «Shyǵys», «Batyl toıtarys», «Aıbalta», «Kókjal», halyqaralyq «Ózara is-qımyl», «Myzǵymas baýyrlastyq, «Beıbit mısıa», «İzdeý», «KazInd» jáne basqa da kóptegen oqý-jattyǵýlarǵa qatysty.
Bıyl «Ońtústik» óńirlik qolbasshylyǵy áskerleriniń áskerı qyzmetshileri «Pákistan armıasynyń komandalyq rýhy – 2024» halyqaralyq jarysynda dalalyq mashyqtyń, psıhologıalyq turaqtylyq pen kúsh-qýat tózimdiliginiń joǵary deńgeıin kórsetip, jeńimpaz atandy.
Áskerı kadrlardy, ásirese zymyran áskerleri men artılerıa mamandaryn, barlaýshylardy, áýe shabýylyna qarsy qorǵanys, ınjenerlik áskerler, radıasıalyq jáne hımıalyq qorǵanys mamandaryn daıyndaý júıesin jetildirýge kóp kóńil bólinýde.
Qarýly kúshterdiń bul túrine kadr daıyndaý Almatydaǵy Qurlyq áskerleriniń áskerı ınstıtýtynda, Aqmola oblysynyń Shýchınsk qalasyndaǵy áskerı kolejde jáne Gvardeısk garnızonyndaǵy kishi mamandar daıyndaıtyn Oqý ortalyǵynda júzege asyrylady.
Joǵary utqyr, tehnıkalyq turǵyda jabdyqtalǵan jáne jaýyngerlik qabiletti Qurlyq áskerleri eldiń egemendigin, aýmaqtyq tutastyǵyn jáne onyń azamattarynyń beıbit ómirin qorǵaýǵa árdaıym daıyn. Sý tasqynynan týyndaǵan tótenshe jaǵdaıda áskerı qyzmetshiler el aımaǵynda turǵyndarǵa kómek kórsetip, eldi mekender men mańyzdy ınfraqurylym nysandaryn qorǵaý mindetterin oryndap jatyr.