Bostandyq aýdany qorǵanys isteri jónindegi basqarmasynyń áskerı qyzmetshileri Uly Otan soǵysyna qatysqan Lúbov Nıkolaevna Gorkovskaıany týǵan kúnimen quttyqtap bardy, dep habarlaıdy Almaty-akshamy.kz.
Lúbov Nıkolaevna 1925 jyly 20 sáýirde Ýkraınanyń Lýgansk oblysynda dúnıege kelgen. Ol nemis basqynshylarynyń basyp alý kezeńine baılanysty aýyr synaqtardy kórdi.
1943 jyly qyz maıdanǵa óz erkimen attandy. Áskerı baılanysshy kýrsyn támamdaǵannan keıin ol birinshi Ýkraına maıdany jaıaý ásker dıvızıasy altynshy polkiniń bólimshesine qabyldandy.
Harkov mańyndaǵy urys kezinde Lúbov Gorkovskaıa qyzmet etken dıvızıa qorshaýǵa alyndy. Alaıda, 1944 jyly sáýirde áskerı bólim jaýdyń qorshaýynan shyǵyp, qarsylas qolynan azat etilgen Sevastopolge shyǵa aldy. Sodan keıin erjúrek baılanysshy qyz Belarýs jáne Baltyq jaǵalaýynda bastalǵan shaıqastarǵa da qatysty.
Jaýyngerlik eńbegi úshin Lúbov Nıkolaevna I jáne II dárejeli Otan soǵysy ordenderimen qosa, basqa da ordendermen jáne medaldarmen marapattaldy. Jeńis týraly kópten kútken habardy ol Baltyq jaǵalaýynda estidi.
Soǵys aıaqtalǵannan keıin týǵan jerine oralyp, halyqqa bilim berý bóliminde jumys istedi. 1946 jyly jubaıymen birge Qazaqstanǵa kóship, eńbek jolyn jalǵastyrdy.
Lúbov Nıkolaevnanyń eki balasy bar. Qazir nemeresimen birge turady. Surapyl jyldar synaǵy densaýlyǵyna áser etpeı qoımady. Sondyqtan jergilikti áskerı basqarý organdarynyń áskerı qyzmetshileri ardagerge únemi baryp, oǵan qoldaý kórsetýge tyrysady. Áskerıler úshin, onyń otbasy men aınalasyndaǵylar úshin Lúbov Nıkolaevnanyń ómiri batyldyqtyń, tózimdiliktiń jáne ómirge degen súıispenshiliktiń úlgisi bolyp qala beredi.