Qazaqstan Úkimeti azamattarǵa onkologıalyq kómek kórsetýdi jetildirý boıynsha birqatar qosymsha sharalar qabyldaıdy. QR Premer-Mınıstri Álıhan Smaıylov Onkologıalyq aýrýlarǵa qarsy kúres jónindegi 2023-2027 jyldarǵa arnalǵan keshendi josparǵa qol qoıdy, dep habarlaıdy almaty-akshamy.kz primeminister.kz silteme jasap.
Qujat Memleket basshysynyń tapsyrmalaryn oryndaý maqsatynda ázirlengen jáne onkologıalyq qyzmetti keshendi jańǵyrtýǵa baǵyttalǵan. Bul – tıimdiligi joǵary erte dıagnostıkany engizýdi, mamandandyrylǵan emdeýdi, pallıatıvtik kómek pen ońaltý sapasyn arttyrýdy, sondaı-aq kadrlyq áleýet pen ǵylymdy nyǵaıtýdy kózdeıdi. Josparlanǵan is-sharalar erte dıagnostıkany jaqsartýǵa, múgedektikti azaıtýǵa jáne onkologıalyq naýqastardyń ómir súrý deńgeıin arttyrýǵa múmkindik beredi.
Máselen, árbir óńirde sońǵy úlgidegi qondyrǵylardy ornatý arqyly naýqastar álemdik standart deńgeıinde zamanaýı sáýlelik em alý múmkindigine ıe bolady. Sonymen qatar qajetti dári-dármekterge qoljetimdilik qamtamasyz etiledi. Aýyl turǵyndaryna kómek kórsetý úshin jyljymaly medısınalyq keshenderdi paıdalaný josparlanyp otyr, bul qala men aýyl arasyndaǵy alshaqtyqty azaıtady. Budan basqa, onkologıalyq aýrýlardy emdeý sheńberinde telemedısına jáne jasandy ıntellekt múmkindikterin belsendi paıdalaný kózdeledi. Jalpy onkologıalyq kómek kórsetý elimizdiń barlyq óńirlerinde biryńǵaı standartqa ıe bolady.
Keshendi jospardyń negizgi mindetteriniń biri – onkologıadaǵy zamanaýı standarttardy qoldaný arqyly respýblıka aýmaǵynda onkologıalyq naýqastarǵa qajetti medısınalyq kómektiń tolyq keshenin qamtamasyz etý. Qazaqstan men eń damyǵan elder arasyndaǵy medısınalyq kómek kórsetý sapasynyń alshaqtyǵyn azaıtý úshin qazirgi ýaqytta stasıonarlyq emdeýden ambýlatorıalyq terapıanyń neǵurlym zamanaýı túrlerine kóshý josparlanyp otyr.
Bul rette onkologıalyq aýrýǵa shaldyqqan balalar men olardyń zańdy ókilderiniń birine hımıoterapıanyń qarqyndy kýrstarynan ótýi úshin kólik shyǵyndaryn óteý josparlanyp otyr.
Josparlanǵan sharalardy iske asyrýǵa ortalyq jáne jergilikti memlekettik organdardy, sondaı-aq medısınalyq uıymdarmen qatar úkimettik emes uıymdardy da tartý josparlanǵan. Olardyń qatysýymen taqyryptyq qaıyrymdylyq jobalary júzege asyrylady.
Keshendi jospar respýblıkalyq búdjet komısıasynyń otyrysynda qaraldy. Onyń nátıjeleri boıynsha 460,7 mlrd teńge somasynda qarjylandyrý qoldaý tapty. Jospardy iske asyrý nátıjesinde qaterli isiktiń asqynyp ketken jaǵdaılarynyń úlesi (III-IV kezeń) 10%-ǵa deıin tómendeıdi dep kútilýde. Pasıentterdi sáýlelik emdeýmen qamtýdy arttyrý 53%-ǵa jetedi. Onkologıalyq aýrýlardan bolatyn ólim-jitimdi 100 myń turǵynǵa shaqqanda 64,5-ke deıin tómendetý kózdelip otyr.
Aıta ketý kerek, Qazaqstanda jyl saıyn onkologıalyq aýrýdyń 4%-ǵa ósýi baıqalady, 2022 jyly 39 myńnan astam jańa jaǵdaı tirkelgen. Búginde 205 myńnan astam qazaqstandyq esepte tur. Buǵan deıingi Onkologıalyq aýrýlarǵa qarsy kúres jónindegi 2018-2022 jyldarǵa arnalǵan keshendi jospardy iske asyrý kezeńinde respýblıkada qaterli isikterden bolatyn ólim-jitim 15%-ǵa tómendedi.