Jelide Klaýs Shvabtyń sózderi talqylanýda.
Dúnıejúzilik ekonomıkalyq forýmnyń negizin qalaýshy Klaýs Shvabtyń aıtýynsha, avtokólikterge ıelik etý dáýiri aıaqtalyp keledi, dep habarlaıdy Almaty-akshamy.kz
Shvab 2030 jylǵa qaraı jeke kóliktiń bolýy zańsyz dep tanylady dep otyr. Bul qanshalyqty ras?
Stopfake.kz-tiń jazýynsha, 2030 jylǵa qaraı avtokólik ıeleri zańnan tys dep tanylady dep málimdegeni týraly aqparat – ótirik.
Bul jańalyqtyń bastapqy derekkózi – The People’s voice jańalyqtar portaly. Bul portal únemi jalǵan habarlamalar, úgit-nasıhat jáne qastandyq teorıalaryn jarıalaıdy.
2014 jyly Dúnıejúzilik úkimettik samıtte, Klaýs Shvab bolashaqta adamdar jeke kólikke ıelik etýdiń ornyna avtopılottyq elektromobılderdi shaqyrý úshin qosymshalardy qoldanady degen ıdeıany alǵa tartty. Túpnusqa vıdeo on jyl buryn jazylsa da, onyń sóziniń naq osy bóligi búginde Jelide tarap jatyr.
Sonymen qatar DEF saıtynda 2016 jyly jeke avtomobılder dáýiriniń aıaqtalǵany týraly maqala bar, biraq onda olar zańsyz bolady dep aıtylmaǵan. Materıal bolashaqta iri qalalarda avtopılotpen jabdyqtalǵan elektromobılderi bar avtoparkter paıda bolǵan kezdegi múmkindikter týraly oılar jazylǵan. Mundaı kólikti jalǵa alý suranys joǵary bolǵandyqtan arzan, al tujyrymdama tutynýshy úshin tıimdi bolady, ol mashınany kútip ustaýǵa, oǵan salyq tóleýge aqsha jumsamaıdy.
Demek, Klaýs Shvab ta, onyń áriptesteri de kólikke ıelik etý 2030 jylǵa qaraı qylmysqa aınalady dep málimdegen joq. Ol bolashaqta avtopıloty bar kólikti jalǵa alý jeke kólikti satyp alǵannan góri tıimdirek jáne aqylǵa qonymdy bolady degen oıyn aıtqan.