Memleket basshysy Beıjińde Ábý Nasyr Ál-Farabıge qoıylǵan bústti saltanatty túrde ashty
Prezıdent Qasym-Jomart Toqaev ózi bilim alǵan Beıjiń Til jáne mádenıet ýnıversıtetiniń aýmaǵynda orta ǵasyrlyq fılosof, ǵalym Ábý Nasyr Ál-Farabıge arnalǵan bústti saltanatty túrde ashý rásimine qatysty, dep habarlaıdy almaty-akshamy.kz.
Ashylý rásimine QHR bilim mınıstriniń orynbasary Van Gýanán, ýnıversıtettiń Partıa komıtetiniń hatshysy Nı Haıdýn, rektory Dýan Pen jáne Memleket basshysyna sabaq bergen ýnıversıtet profesory Lú Shısın, sondaı-aq QHR Memlekettik óner murajaıynyń dırektory, músin avtory Ý Veıshan qatysty. Memleket basshysy, eń aldymen, Ál-Farabıdiń álemdik órkenıetke qosqan zor úlesine aıryqsha toqtaldy.
– Barshańyzǵa málim, Ál-Farabı – Shyǵystyń uly oıshyly, onyń álemdik órkenıettiń damýyna qosqan úlesi orasan zor. Ál-Farabı Qazaqstan aýmaǵynda týyp-ósti, bilim izdep kóptegen elge bardy. Matematıka, jaratylystaný, astronomıa, fılologıa jáne basqa da birqatar ilimdi damytýǵa zor eńbek sińirdi. Adamzattyń damýyna ólsheýsiz úles qosty. Ol fılosofıalyq týyndylarynda ádildik ıdeıasyna erekshe nazar aýdardy. Qaıyrymdy qoǵam jáne úılesimdi memleket qurý máselesine basa mán berdi. Adamgershilik pen rýhanı qundylyqtardy dáriptedi. Ǵalym mýzyka jáne kallıgrafıa ónerin zerdeledi, – dedi Prezıdent. Qasym-Jomart Toqaev ensıklopedıalyq deńgeıdegi, ıaǵnı jan-jaqty bilimi bar Ál-Farabıdi zamandastary Arıstotelden keıingi «Ekinshi ustaz» dep ataǵanyna nazar aýdardy.
