Bul týraly Úkimet otyrysynda QR Ónerkásip jáne qurylys mınıstri Qanat Sharlapaev baıandady.
2024 jyly 64 myń azamattyń turǵyn úı jaǵdaıyn jaqsartý maqsatynda turǵyn úı qurylysyna 1 trln teńgeden astam qarajat bólindi, dep habarlaıdy Almaty-akshamy.kz QR Ónerkásip jáne qurylys mınıstrliginiń baspasóz qyzmetine silteme jasap.
Elimizdegi jalpy turǵyn úı qurylysyn alsaq, sońǵy 5 jylda turǵyn úı qurylysyna 12 trln teńgeden astam ınvestısıa tartylyp, 78,5 mln sh. m. jańa turǵyn úı paıdalanýǵa berildi. Osylaısha, barlyq qarjylandyrýdyń kózderi esebinen 695 myń otbasy turǵyn úı jaǵdaılaryn jaqsartty.
«2030 jylǵa qaraı, qarjylandyrýdyń barlyq kózderi esebinen 111 mln sh. metr turǵyn úı salý jáne 1 mln-nan astam otbasyn jańa turǵyn úımen qamtamasyz etý josparlanyp otyr», – atap ótti Mınıstr.
2024 jyly ekonomıkalyq ósýdi qamtamasyz etý jónindegi i Úkimettiń is-qımyl josparyna sáıkes, turǵyn úı qurylysy kólemi azamattardy turǵyn úımen qamtamasyz etý boıynsha qosymsha sharalardy engizýmen 15,5-ten 18 mln-ǵa deıin ulǵaıdy.
Sonymen qatar Qanat Sharlapaev sý tasqynynan zardap shekken azamattardy baspanamen qamtamasyz etý sharalary týraly aıtty. Bul kelesi mehanızmder: ákimdiktermen daıyn páterler satyp alý, zardap shekken azamattardyń bekitilgen jobaǵa sáıkes óz qalaýymen baspana tańdaýy, ákimdiktermen jóndeý jumystaryn júrgizý nemese olardyń shyǵyndaryn óteý.
Mınıstr saıajaı ıeleri, eger bul olardyń jalǵyz baspanasy bolsa, olardy baspanamen qamtamasyz etý, sondaı-aq qıraǵan úıge quqyq beretin qujattary bolmaǵan jaǵdaıda baspana berý týraly aıtty.
Qurylys jumystary aıaqtalyp, turǵyn úı satyp alynǵansha zardap shekken azamattar ýaqytsha baspanamen qamtamasyz etiledi. Óz kezeginde, zardap shekken azamattar úshin qoldanystaǵy normalar memlekettik turǵyn úı qorynan turǵyn úı berý tetikterin, sondaı-aq óz betinshe qurylys jáne jóndeý jumystaryn júrgizgeni úshin tólemderdi qarastyrady.